:: 炸醬麵

每個星期日晚十二點幾,深宵時份,無線擺咗套有「M 成年觀眾」的韓國電視劇集 《狐貍小姐你想點》出來播。好坦白,尋常日子就點都唔會睇,翌日星期一唔使返工咩?但就因為病到反常的關係,上星期有幸睇咗一集。

故事是圍繞一對已發生關係的姐弟戀身上。女方三十四,肥矮醜加粗魯惡死,但竟然引來診所醫生及比她後生十年的後生仔追求,話題有點大膽。劇中女主角化淡妝,刻意營造出蒼白膚色,而「嬲幽」的頭髮同樣是主角的賣點之一,都幾好笑。




終於入正題,夜晚十二點幾播,一集個多小時,竟然出現三、四場食飯場面,由豐富的晚宴,到簡單的員工午餐,真係睇到都覺得肚餓,尤其是女主角的同事講咗句:「我每日都為咗揀炒麵或炸醬麵而非常煩惱!」,我突然間覺得好肚餓,仲好想「啪」返碗韓式的炸醬麵。

是晚當然無法解慰我對炸醬麵的幻想,繼而翌日下午便飛身走去韓國餐廳,點一碗地道的韓式的炸醬麵。



工作附近的韓國餐廳,除了賣大包的韓式碟頭飯外,而且更有韓國麵供應,如果唔算肚餓,三十蚊碗炸醬麵絕對夠醫飽你個肚。但係……. 呢種韓式炸醬麵的味,食得慣就 GOOD 喇,食唔慣的話,我諗大家倒都倒唔切呀!如各位要點呢味前,請三思三思。
[PR]
by karvitz | 2009-07-29 23:59 | :: 好想好相