人気ブログランキング | 話題のタグを見る

:: 小三作文題。

記一年聖誕節。(字數五百字以上)



廿四號都要留守到六點幾先收工,無平安夜派對就一支公返屋企,真的過咗一個好鬼平靜的平安夜。聖誕節正日攤到十二點幾先起身,走出去尖沙咀,海港城水洩不通,迫多一陣嫌費時,匆匆買完禮物後即閃。

行過新港中心,諗住行吓 Cotton On 執平貨,點知已經執咗笠,失望。因為唔想行海防道,所以兜咗個大圈從中港城行過去九龍公園,好難得尖沙咀仲有一個空曠的地方,可以有足夠空間俾你呼吸及慢走。

行過去加連你老豆 (加連威老道) ,諗住去龍城買枝剃鬚膏。一望入去龍城,部份貨架只得一兩枝存貨,香水櫃台又迫滿自由行,最可憐的是,連用開的剃鬚膏都清倉,無貨,痴__線!



再行過少少,另一間 Cotton On 又來。門口大大隻字做半價,二話不說就攝入去睇睇。點知特價欄只得一小撮,連上次減價的薄外套都回復正價,無心情。

逛完街就返屋企,煲咗套《吸血新世紀》,記得 Kary 在勁歌金曲講過,佢好愛呢套戲,之後就唱咗首相關的〈愛德華時代〉,係Wyman 有心填俾佢的。

講到呢套戲咁厲害,第二集又咁收得,點都應該要拆解下箇中原因。查實個故事都是一般的愛情吸血彊屍片,只不過導演不停地 Close up 男主角個白臉及化到好大好有神的利眼及青春無敵,一眾「長」「中」「幼」女睇到,點會唔發癲呀!如果要開拍香港版,我覺得 Dear Jane 的主音 Adam 最神似,但在公仔箱裡面呢,Dolce Vita 的 Jason 已經扮過兩次,唔敢講話唔似,因為齋睇左邊側面係確實有幾分相似。

九點幾,幾個月無見的「神」系朋友 (喜歡玩突然失蹤了) 打電話約去飲嘢,無事做就當然奉陪。但「飲嘢」呢兩個字唔好諗得太多,佢一杯熱檸水,我一杯凍朱古力,一間茶餐廳,坐到十一點就係咁多。

聖誕節就係咁囉!
by karvitz | 2009-12-29 23:58 | :: 日記仔女