:: 餘.慶

「餘慶」呢兩個字幾好,呢一刻我可以解作聖誕節後餘下來的慶祝活動。



廿五正日似乎太悶,但我卻幾珍惜呢一日的安寧。扑星地去咗網友新屋參觀打機及火窩,從露台望出去,廿幾樓居高臨下,就算望樓景都好好睇,只係覺得吹埋來的海風濕濕立立咁,如果唔係咁,企出去一整日都得。要謝過呢位網友招待先。



廿七號就係一年一度的聖誕派對加交換禮物日,呢個習俗都奉行咗十幾年,夠晒傳統。今年移師朋友 A 的新屋舉行,下午班同學就先開賭及玩屋主的三隻家貓,晚上班的同學就食日本餐兼交換禮物,今年破天荒有十二個人出席,真犀利。禮物方面就不多講 (另有一段) ,大家最後都捧住個肚走之餘,更捧住大包小包禮物返歸。




仲未完喎!大專同學會的聚餐都未食。天口凍,打邊爐當然最實際。五大一細走咗去尖沙咀德興,難得今次的奶皇水晶飽算新鮮,好食。小朋友大得好快,無見幾個月,佢著條 Uniqlo 修身牛仔褲 (細細個就著名牌,佢阿妹更加會著 H&M,但阿媽話係特價貨) 感覺上真係高咗好多。



食完飯兜一兜尖沙咀,行過半島酒店門口,先記起十年前有三個後生仔,一個長髮、一個肥、一個大隻在噴水池邊影過相。呢一刻返回舊地,長髮變短髮,肥就無咩點變,大隻就變咗爸爸,有一仔一女,真係諗都無諗過。人地老婆覺得呢一刻好有紀念價值,強迫我地再企同一個位再影一張。笑!

係囉!咁就過咗十年喇!

再行埋 1881,夜景確實不錯,但耳邊不斷傳來「好似美利樓」 、「好似美利樓」及「好似美麗樓」(發唔正音)。說真都有幾分相似,而整個 1881 最不錯的地方是特意地把古樹盤根的位修葺過,變成燈塔型的地台,而古樹就高高在上,加埋打燈效果,幾有動畫裡面仙境的感覺。

行行下都十一點幾,各位翌日都要返工,只有小朋友繼續放假,他臨走時仲叫我今晚去佢屋企玩 Wii。阿仔,聽日唔使返工咩!唔使返工就話陪你癲下。最後約定下個月先去玩,小朋友唔呃得,應承咗就一定要做得到,所以下個月等我喇!

仲有,夜晚餐打邊爐都未俾錢。人地阿媽,你擇低先,下次一定一定一定會補返。
[PR]
by karvitz | 2009-12-31 23:33 | :: 日記仔女