:: 取.捨



一向對陌生人都會恭恭敬敬,絕不會出現輕佻驕傲及立亂說話的徵狀,好歹都信山水有相逢呢個定理,但睇來今次我真係要「迫 the 烏」喇!

話說一行六個朋友去旅行,咁鬼多人一齊玩就當然跟旅行團比較好,等領隊導遊安排晒一切,唔使自己揸主意就唔會出現你去東我去西的呢類多舊魚麻煩事。咁跟得有咁上下的旅遊公司去旅行,當然就有茶會呢種逐漸被淘汰的團解聚會模式。而呢一團就共有十七隻鴨仔,雖然唔係每個團友都有出席,但我們就已經遇到個超麻煩,貌似鄭佩佩八婆樣的大嬸。



她一早已不停地問 briefing 的哥仔,「到底我著幾多件衫好?」、「酒店只係得兩間五星?」及「食飯點解要自己俾錢?」等等問題。(後兩者在旅行團的單張上已寫晒出來)。

開完個所謂茶會出來,阿嬸轉個頭就來嗲我們,佢問「五點半就集合,巴士都未開喇!我一定唔會搭的士架,通宵巴士都唔搭,我只會搭頭班車,五點二十分開,六點前應該就到,你話得唔得?」痴線!佢問我得唔得,我答佢「我會坐通宵的機場巴士準時到!係準時到!」佢再自圓其說「我六點前應該一定到喇!哈哈哈」咁就行開咗!我就無佢咁好氣,而朋友就話佢想試探我地會唔會遲到喎!

臨走前,佢再走埋來問「哥仔呀,我同老公唔想自費去上海夜遊 (呢個夜遊要一百蚊) ,我諗你地都應該唔去喇!不如我跟埋你地一齊出去自己玩呀?」我身邊同行的女士已經搶住答「唔好意思喎!我地六個人,唔係話我地唔去就唔去,我地仲要睇人地頭喎!」一句就想彈走阿嬸。其實阿嬸仲想死「螺」,但我已經答咗佢「去到先算喇!」

想過度過,跟朋友傾過,連阿媽的意見都問埋,得出個結果就係唔好再理呢個阿嬸,去食飯去廁所落車睇金華火腿三潭印月時都唔好理佢。見到佢就板起口面,對住自己朋友就嘻嘻哈哈,佢自己就應該會知難而退,加埋老媽話齋,去旅行都係對佢五日,又唔係要同佢做朋友,點解要對佢咁好?

咁諗都算思想正確,我寧願得失一個阿嬸,我都唔想整個旅程都被煩煩煩煩煩__住晒!

希望過程如我想像,阿嬸識得知難而退就好!
[PR]
by karvitz | 2010-01-13 23:56 | :: 日記仔女