:: 《緣滿情人節》



大雜燴式的愛情小品,加上各有牽連的人物關係,自《真的戀愛了》出現便百花齊放般湧現。無可口非,珠玉在前,要超越前者的既溫馨又圓滿及窩心,你估真係咁易?

一切都是緣自《Alias》。

電影未上已經叫定朋友入戲院睇,無非都是對電視劇《Alias》的舊拍檔有種情意結。

劇中女主角 Jennifer Garner 在《Alias》中率先突圍,當了女主角幾季後便躍登大銀幕,擔正過幾套大片,但可惜票房不佳,最後淪落 (應該用「淪落」呢兩個字嗎?) 到拍小本製作,當上《Juno 少女孕記》裡面 Juno 的媽媽,恰巧電影大收,又令她有機會上位。



在《Alias》當記者的 Bradley Cooper,在電視劇裡面跟 Jennifer Garner 有過一段情,可惜角色發揮不多,紅唔起。默默地做咗幾年,直到近年的《醉爆伴郎團》才有機會踩上一線,前途開始光明。今次還同 Julia Roberts 有對手戲,up and coming 喇。

講返套戲,幾段出現在情人節的緣份都恰可,沒有過份的誇張,把發生在大城市的愛都表露出來。其實 Anne Hathaway 既可以 elegant ,又可以豪放爆粗,不錯。與她配為一對的《蜘蛛俠 III》的 Topher Grace 都不錯,傻更更的都幾吸引。Julia Roberts 與 Bradley Cooper 的幾幕高空三萬呎都幾自然,但後者與欖球員的交流就稍為生硬,同性戀真係唔易做喇!

再講,《一夜賭城戀大咗》的 Ashton Kutcher 今勻唔使脫,但繼續當上情深傻呼呼男角,討好但角色已太定位,而配 Jennifer Garner 亦顯得有點姐弟戀。Naked Guitar Player 一段亦好笑,真的是犧牲色相為搏君一笑。而《吸血新世紀 – 新月傳奇》的Taylor Lautner 及其小天后女友 Taylor Swift 亦愛得夠晒痴纏,年青大晒!

說到底,今個農曆年頭要跟情人浪浪漫漫睇場戲,無理由揀《蘇乞兒》或《錦衣衛》,而《72家租客》及《花田囍事 2010》就應該一家大細入場笑餐飽。揀下剩下,《緣滿情人節》就應該是在農曆年期上畫,最窩心而又睇得開懷的一齣電影,男朋友女朋友們,準備入場未呀?
[PR]
by karvitz | 2010-02-12 22:12 | :: 日記仔女