:: 減肥大計。



上一次的起心肝話要減肥的是幾年前,在澳洲旅行返港後,每個朋友睇完我的旅行照後都話「肥到咁?」。之後我決心就擺咗張相在銀包,警惕自己唔可以再肥。咁當年真係減到,肥包包面變返無咁包,而個肚腩仔都縮咗小小,算是小成功。

話說我家的男士 (包括老豆及阿叔) 都有中年發福的情況出現,用遺傳學來計一計,我發 (福) 的機會絕對大過八成。不幸地,呢個發福警號已經於二零零九年響起咗。見住我個 bb 日漸漲大,而自己又唔忍口不停食,加上一日三餐都在街外吃,運動又再減少的情況下,肚腩一發不可收拾喇!是前所未見咁恐怖,睇來都是時間要整治一下呢位大邪神。



當年遇過位營養師,她說最簡單的減肥方法就是晚餐不要吃得太飽,而且睡覺前不應再多吃,因為晚上消耗的能量不及白天的多,所以吃得足夠就可以。當年我就是嚴守呢條戒條,再加上適量運動,所以賤肉橫生的景象才有暫緩趨勢。

一零年開始,是時候踏入一個新階段。首先當然以晚餐少吃為主,就算晚餐要自煮,我務必只煲一個菜湯塞飽自己就算,這樣又健康又能夠減脂。而運動方面,絕對希望 / 祈求 / 儘量一星期抽三天去做帶氧運動,出一身超級汗再求一晚安睡,正晒!

我的要求只是希望撇甩腰間兩邊的贅肉,再把大腿的肥肉收緊就夠喇!六舊腹肌?算吧喇,二師兄!呢類玩意我孭唔起喇!
[PR]
by karvitz | 2010-02-23 23:47 | :: 日記仔女