:: 置業難?



話說老死 A 跟男朋友同居好一段日子,樓房是大家夾錢買的,之後就公一份婆一份夾手夾腳供。近排老死 A 心癢,想膽粗粗咁買多個單位收租,佢諗住男朋友背後應該仲有點私己,諗住趁市道好再搏一搏。咁前排食飯老死 A 就拎咗呢個問題出來討論,最後當然要打退堂鼓,其中的原因包括借貸問題及入息的關係。

從呢個討論,老死A 帶出了另一個問題,就是她說其男朋友無目標。老死 A 說其男朋友只懂得儲蓄,欠一個明確的目標,就例如想儲錢買樓,儲錢買車,儲錢娶老婆等……



話說我跟朋友 D 在大半年前都討論過呢個問題,當時朋友D剛分手,一下子把結婚置業的計劃全盤打散。我問朋友D「而家有無諗過儲錢為咗做咩?」,朋友D 答唔出,只是講咗句「而家唔使攪咁多嘢,我的股票就唔使急住賣蝕錢!」由呢一刻開始,我就下咗過決定,決心要買樓置業,搵返個目標及負擔,讓自己知道條路點樣走。

霎下眼又大半年,樓價有上無落,對於我呢類中產又未到,但又沒有抽居屋資格的我,要置業真係難過登天。

近期房協的十二年「新」樓疊翠軒開售,首次引入單身人仕申請,但照其睇樓的瘋狂程度,用家庭入紙都未必有機會被抽中,想置業安居真係咁難?難道我真係要聽曾特首講要搬入新界?夾硬把香港兩極化?

老死 A 一年前買樓的時候都怕買貴咗,一年過去喇!樓價是比上年升咗,所以她才萌生出多買一房作收租用的念頭。我?錢就係得咁多,想住近少少娘家方便探望一下老媽,但又負擔唔起,難道真係要迫到我北望天水圍,返南區屋企都要轉接兩個鐘咁辛苦先安樂?

望細價樓價跌十個百仙,就是我踏入二零一零年後的第一個小心願。
[PR]
by karvitz | 2010-03-10 23:30 | :: 日記仔女