:: 南區人



小弟本是南區人,以前出出入入都習慣巴士代步,來來去去都只有幾條線選擇,唔可以話方便,但勝在夠簡單。

話說搬離南區都快一年,仍然習慣以巴士為主要交通工具,有什麼唔識路就立即上九巴網站查察,為求搵條又快又方便的巴士線。有一次從深水埗出發去荃灣,上網做功課後找到有一路巴士直達荃灣,滿心歡喜地走到巴士站等車。

痴線!由深水埗到荃灣竟然用咗我一個鐘頭,左兜右兜,又葵芳又葵興又大窩口村,真係兜到發癲。之後諗深一層,點解唔搭港鐵呢?之後就覺得自己好傻仔,之後講明以為點都要坐港鐵。



下個星期想去又一城走一轉,突然間又想知道有無一程車可達九龍塘,咁當然又上九巴網頁搵。正!呢次竟然發現有三條巴士線可以直達廣播道附近,行返去又一城都唔算好遠路,實在太美好喇!但過咗十五分鐘,我先再諗深一層。頂!原來港鐵又直達仲唔使行,真低能。

鬼咩,雖則我在港島區返工,但上下班都有隧道巴直達,返娘家又可以一程車就到,完全唔使港鐵 Support 都可以。加上舊底南區無港鐵,巴士理所當然是第一選擇,別無他選喎!所以習慣晒喇!

我講出來係俾大家笑下我蠢,但同時間可以提出下條條大路都通羅馬,唔好覺得自己走錯咗冤枉路而要發老脾,最緊要在錯的地方做返正確,下次學精咗就無人敢笑你上一次做傻仔喇!
[PR]
by karvitz | 2010-03-12 23:00 | :: 日記仔女