人気ブログランキング | 話題のタグを見る

:: 雪梨水



前排阿蘇教燉川貝雪梨,我無咁好心機又燉盅又川貝,只懂得買幾個雪梨,劈開四份去芯,之後就放入煲用大火煲一個鐘,之後再收細火煲個半鐘,加埋冰糖就完成咗最簡單的補濕用品 – 雪梨水。

話說細個老媽成日都煲雪梨水,皆因甜甜地易入口,一大煲雪梨水唔使一晚就俾屋企三隻化骨龍 (包括我) 飲晒。細個成日問老媽點解唔煲多少少放入雪櫃冰一冰,應該仲好飲。老媽就答一句「我已經煲咗一大煲喇」

阿蘇教燉川貝那晚,我同老媽坐響沙發一齊睇。老媽講咗句「我都好耐無煲過雪梨水,邊有時間煲呀!你地都好耐無飲過」我答「係喇係喇!」



之後我自己落手煲,齊晒料就是是但但咁倒一大煲水落去煲。過程中我不時都有瞄住,發覺水愈來愈少,一邊煲就一邊蒸走咗裡面的水,我試過中途加過一次水,但最後的製成品就只係剩返半煲。

我終於都知道老媽點解每次煲出來的雪梨水都係得咁少,除了是蒸走咗之外,最大的原因都是老媽的一番心機及耐性,辛辛苦苦咁又要較火又要調味,而家自己試過喇,才知道以為是簡單的事原來從來都唔簡單。

最後,初次啼聲的雪梨水就只要兩枝半 500ml 的可樂樽咁多,而且味道都未夠完美,所以呢次都係自嚐算喇。下一次,下一次都是時候等我為老媽調一煲唔失禮的雪梨水等佢潤一潤抖一抖喇!
by karvitz | 2010-03-25 23:26 | :: 日記仔女