:: 女同事,四.自己拎來 X

:: 去行山喇!

屋企電腦壞咗,間接令到女同事系列繼續。

上一期說到女同事復活節宅在家,我問佢點解唔出去行下山,其實係有前題的。

話說復活節前的某一個週日,公司攪咗個慈善籌款活動,要大伙兒晨咁早起身去行山。而我被上司點中要出席,而女同事就一早參加咗。而同行的,還有兩位要做 Supporting 的同事。

當日女同事的衣著稱身,橙色汗衫配運動衫,但配咗一個 Shocking Pink 的單邊揹手袋,佢報稱話有兩支水及少許零食在包包裡面。我問佢「點解唔揹個背囊或者放低係 Office 回程先拎?」,佢話「上次行山都係咁揹!都唔係好重!」



行到中後段,女同事的速度減慢,問佢是否唔舒服,佢就話個袋好重行得好辛苦。大家以為我又會幫佢,但Sorry喎,我已經失去咗主動去幫佢的力量,而呢次我都想佢明白自己拎來的苦係要自己承擔的。(連 Supporting 的同事都唔幫佢!覺得呢次唔抵幫。)

講開自己拎來…

今年公司春茗,女同事坐我隔離,當百花釀蟹鉗上菜之際,女同事講咗句「呢個我鐘意食呀!」咁佢呢句說話就剛剛好傳到上司耳邊。我咬咗兩啖蟹鉗之後跟女同事講「我唔係咁鐘意蟹鉗加蔥同埋馬蹄!」佢話「我都唔鍾意佢咁整,好難食,不知所謂!」

由於有同事缺席,所以碟上仍餘下兩隻蟹鉗,又由於上司聽到女同事話喜歡食蟹鉗,所以上司就急急忙咁將碟上的蟹鉗遞向女同事。女同事望一望我,我即時暗笑咗出來,真係鬼叫你連食都未食過就話鍾意食咩!

最後,女同事都無婉拒到上司的好意,暗暗地食埋呢隻唔好食,而且仲要凍晒的蟹鉗。有咗呢次慘痛經歷,睇下你下次仲敢唔敢「未出發先興奮」。
[PR]
by karvitz | 2010-04-17 01:33 | :: 日記仔女
<< :: 志明與春嬌 :: 一零音樂.十二.陳奕迅.... >>