:: 小學雞


小學時代,我們總喜愛標籤某一類同學,幾日唔換校服臭到死的阿威,又或者是傻傻地的阿蘭,我們一概都唔同佢玩,而且有些佻皮的同事更會加鹽加醋,例如屈阿威件污穢校服有屎,邊個同佢玩的都會有屎。呢個傷害性強流言傳開去後,阿威就漸漸地被孤立,這可以說是欺凌,但同時亦可界定呢類動作為小學雞。

咁當年我都算合群,雖然校服不是白雪雪的熨貼,但總有人比我更污穢。中學時代,出自第五級學校的,除非有人撐腰又或者成績突出,中游份子的大家通常都會有受過欺凌經驗,可能是一次半次,亦又可能是全個學期。最簡單的就是午飯時候被甩,說好了一大班人食飯,點知轉個頭就雞飛狗走,有些迫不得已走唔切又或者有點良心的,就夾硬坐埋同枱食飯,食完都覺得委屈。



以上的小學雞,在工作環境都依舊有出現。大概男生都是喜歡逃避,女同事被革走之前,她都想融入大家。可惜…有些男同事一見到佢就話「你行先喇!轉頭 join你」,講十次有九次都甩底,唯一一次就是大家坐埋同一間餐廳,無得避。我雖然是男人,但就絕對唔係好睇得過眼呢類行為。根本都無心一齊食就開心見誠講,何必要講個大話去遮另一個大話呢?真係傷到人地個心都唔知,呢類無益處的小學雞動作,唔該戒咗佢喇!

今日女同事重新轉場再開工,希望佢一切順利吧,話晒都已經不再是十八廿二,好應該自己有適當判斷,唔好再俾人牽住鼻子走。呢邊的小學雞飯局,我繼續幫你頂喇!
[PR]
by karvitz | 2010-06-01 23:21 | :: 日記仔女
<< :: 《Hot Tub Tim... :: 中華情.一 >>