:: 悠長的戰爭...



. 一直都有儲錢,目的由唔知為咩到去旅行,之後更到想搵個地方搬,不用買入,租的就可以。現在總算達成目的,但下一步又是什麼呢?我記得零八年曾經走過入青衣,輕輕望過下灝景灣的樓價,那個時候已經覺得買唔起,何況今日?時移勢逆,我終於想有個自己的家,是一個屬於自己的單位,鑽牆上吊櫃及掃過青草綠的牆色都可以自己話事的單位。

. 六月中走訪過幾幢大廈,睇過幾個單位,發現中下價的單位仍有不少選擇,但再查一查以往成交,由三月份的九十八萬成交到六月中的一百二十萬放售,中間差二十萬,萬一樓價跌,呢廿萬真係唔講得笑。




. 最近,同單位有投資客以一百二十萬成交,旋即以一百四十二萬放售,又加價二十萬,真係痴線!我梗係唔會入貨,點都要等樓市塌先至進場,但幾時先真正跌呢?同埋而家開價一百四十萬,前計後計要跌四十萬我先有興趣入市,咁計一計,即係個樓市都跌三十個巴仙!30%?話咁易咩?

. 過去幾個月樓價不斷升,政府就算推措施都壓抑唔到樓價,那些辣招都只是針對貴價樓炒風,並不見得想幫一班要上車的朋友。等政府?唉.....而家唯有等個市自然見頂,之後隨大市加息而跌價喇!

. 政府呀政府,你幫唔到平民就算喇!唔好再攪其他嘢喇,例如什麼廿三條輕量版,在大庭廣眾亂發脾氣,唔好再做喇!乖乖地做一些市民所需的事出來好唔好?最多我買兩包頂級魚糧過你餵魚喇.... 乖喇
[PR]
by karvitz | 2010-08-21 23:07 | :: 日記仔女