:: 食 Lunch 囉!

d0039085_22435796.jpg

茶餐廳食午飯,通常都係揀午餐 ABCD ,因為呢幾個餐通常係同你條命一樣,係整定!快手揀好、快手食完咁就可以行街買野訓陣覺咁。

公司附近有間算中級的餐廳,但都是午餐 ABCD 款,唯一不同的是,他是「比較」無咁似你條命,即係塊豬扒仲會脆脆地咁送到你面前,碟炒意粉就真係出晒煙熱辣辣咁!但就因為係咁,所以呢間餐廳的出菜時間比較慢。

話說近排有個媽媽級的新手待應上場,睇得出佢對份工好緊張,但愈係咁,錯的機會就愈多。




今日,媽媽級一直企係水吧,一有碟頭出,佢就拿拿聲送出樓面,唔錯!幾快手腳!但可惜佢係送錯晒!佢捧住兜意粉去 1 號台問人有無叫意粉,有人認頭就放低算數,但其實兜意粉係屬於等左 15 分鐘的 5 號台陳小姐的,咁等到人都癲的時候仲眼見俾人遲來先上岸,咁陳小姐就捉個 senior 來問喇!

Senior 超唔好意思地 say sorry,之後拿拿聲入廚房拎碟剛剛炒好的出來,總算平息怒火。

哼!媽媽級轉頭又拿拿聲拎碟豬扒飯衝出去 2 號台問有無人叫豬扒飯,阿 senior 睇漏左一眼, 8 號台的豬扒飯就空降左 2 號台喇!

就係咁,成間餐廳出菜的次序就全打亂,食客就梗係投訴到爆喇。之後 senior 半鬧地對媽媽級講「你企出樓面,唔好企水吧,你都唔識睇單,送錯晒,你企出去喇!」我以為媽媽級會死死氣地走出去,點知佢仲係企係水吧位等出菜...... 個 senior 都無辦法... .....

點知!轉頭又再錯多次。

餐廳唔大,senior 點鬧,媽媽級點錯大家都一眼睇晒!我就覺得個 senior 好難做,又要對客 say
sorry,又要教育個唔聽話的同事,俾著我,我都覺得好難做。

唉!其實我個豬扒飯都仲未到呀!
[PR]
by karvitz | 2011-06-01 23:09 | :: 日記仔女