:: 江山美人。



某星期三晚,我被迫地跟老媽看了齣邵氏出品,五六十年代的電影,名《江山美人》。

最初悶到我差點瞓著,直到中段開始入戲才有返點精神。故事耳熟能詳,其中一段就是籌款節目常唱的《游龍戲鳳》,即是皇帝誤闖梅龍鎮並調戲賣酒妹的一幕。



主角鳳姐由林黛飾演 (老媽子講的),鳳姐在酒家當賣酒妹,在一次無聊時玩扮仙女散花偶遇喬裝出巡的真皇帝。男的看到鳳姐的美貌意亂情迷,借故在酒家揩油摸手,鳳姐由抗拒到受落都只是半天時間,最後皇帝更藉捉蟋蟀之名留在酒家,就在那晚,鳳姐就跟皇帝搭上了。

事前我只知道《游龍戲鳳》的一幕,還以為是大家調調情而矣,原來後半部仲有一夜情發生,皇帝信誓旦旦咁話一定將鳳姐娶回宮,但受母后反對繼而再派大量美色迷惑皇上而令他立即忘記鳳姐。

嘩!呢招真絕,真係有邊個男人可以頂得住酒池肉林…….

鳳姐被皇帝攪完之後就大埋肚,被人不停唱未婚生子,就連街外小朋友都係咁唱 (真係唱歌咁唱出來)。鳳姐終日以淚洗面,仲病到七彩,之後佢大佬就翻山越嶺去搵那個負心皇帝。大佬終於把故事唱 (係!又唱) 到皇帝的耳邊,呢個時候,皇帝終於記得有鳳姐呢個女人,就立即搵大班人馬去接鳳姐回宮,本以為大團圓結局之際,我老媽爆左一句「佢死左響個門口度喇!」

下!咁悲涼的故事?阿媽仲講「呢個女人條命唔好,享唔到福」,老媽真入戲。

電影橋段其實幾多反駁位,但難得竟然係女主角病死收場,而完場亦斬釘截鐵再無拖泥帶水咁,幾前衛喎!仲編得好過無線的肥皂劇喇喂!
[PR]
by karvitz | 2011-07-27 23:04 | :: 日記仔女