:: 神奇的。
d0039085_2112735.jpg :: 整張唔關事既相先。

記得八、九歲時唔見左個銀包,明明係帶咗出街,點知,當晚就係床底搵返喎,真神奇!

中學時代,每年的畢業典禮都會邀請各級各科成績前三名的同學上台領獎。通常呢個時間,我都係坐台下拍手掌及打瞌睡。中四的上學期,學校失驚無神地把體育科全級第三名塞咗俾我,自己知自己事,但無謂去爭辯,最後我都上台拎左個獎,又係神奇。



而近期最神奇的事就莫過於我自己整返部電腦。

Hardware 一直都係我弱項,但偏偏每次電腦壞都關 Hardware 事。以前跟屋企人住,細佬係電腦部主管,疑難雜症全包,當年就係過份依賴細佬,所以每次壞火牛 (壞過兩次) 及死 Harddisk (試過一次) 都由佢一手包辦而我就無牽涉在內的。

搬咗出來住咁耐,前排部腦終於開唔到機,情況跟以往一樣,未開到 Windows 就已經自動 reboot, 不停 reboot,最後要強迫熄機。我試過將 RAM 插穩 – No,我又試過換底板電池 – No,我更試過 check 過火牛電壓 – 都 No,唉!我又氣餒喇!

在公司尋求過同事的意見,他們說最大可能係 Harddisk 死,同事借咗條Cable俾我,返屋企一試就發現 Harddisk 有 Bad Sector,簡單說就是 Harddisk 有壞,而且更壞在 Windows 放重要資料的地方,所以就連機都開唔到喇。

橫掂都係死,不如搏一搏。

循非正式途徑在網上搵到個 Program 用來修復Bad Sector ,第一次用就已經拖垮咗部 Back up notebook ,第二次小心翼翼再試,修復了十一個鐘頭之後終於完成,急不及待將 Harddisk 回歸原處………. 終於開到機正常運作喇!真係感動到想喊…… 但偏偏就係喊唔出。

雖然不是失經無神咁開得返機,亦無如電視橋段咁拍兩下就好返的神奇情節,但我竟然可以一手一腳將部電腦由死變生,呢件絕對可歸納入神奇事,而且仲要係好.神.奇 o個隻。
[PR]
by karvitz | 2012-04-27 23:03 | :: 日記仔女
<< :: 悉尼遊 :: asos >>