:: 我懷疑大家都有失憶症。

近日在工作上,我遇到兩件「勞氣」事。

1) 老頂搵咗間公司翻譯文件,完成後當然要收錢,咁公司的會計部一向手腳都比較慢,一般都要超過三十日的數期才能找到條數。翻譯公司剛好在發票開出的一個月後就立即追數,老頂由於要出國就將呢個追數電郵 Forward 左俾我跟。我查證過後,支票應該在十日後寄出,咁我就親自打電話俾翻譯公司的負責同事,叫佢多等十日!我留晒電話電郵及聯絡方法佢……… 講埋「如果十日後仲未收到就搵我喇!」

十日後,真係未收到錢。那邊負責同事依舊整個電郵俾我老頂,我老頂又 Forward 返俾我,仲問我跟成點?(-_-) OMG!點解我留晒資料,佢唔搵返我,要唔用腦咁 Send 電郵俾老頂,咁樣攪一攪,我老頂以為我無跟過喇!慘!(氣餒)




2) 另一單,話說我地買咗件儀器,間公司會派人來做一場 internal training。由於老頂星期五下午才返工,咁決定邊日 Training 呢類雞毛蒜皮的事就等佢返來先問。咁我星期四就好聲好氣同那邊的負責同事講「老頂星期五下午先返,你地星期六返唔返工?唔開工的話就星期一先答覆你。」佢答左句「好喇!你星期一覆我!」

星期五一早佢又打電話來,其他同事接左話老頂未返,之後那邊的同事就話要搵我,佢講「又話佢星期五返,你同事話佢未返喎!」我聽到呢下已經有點火「X 生,尋日先同你講過老頂星期五下晝返。我仲問左你星期六開唔開工,唔開的話就星期一先答你」佢答我「我無印象喎,唔記得咗!」我仲火問「尋日先答今日就唔記得?」佢答「咁 Sorry 囉,一個電話問下遮,No Big Deal 喎……」佢唔講呢幾句都算,佢講完我當場激到「啤」一聲,我粗粗地回左佢幾句話星期一覆佢就算………

我好懷疑,其實有問題那位係唔係我呀?
[PR]
by karvitz | 2012-05-13 20:42 | :: 日記仔女