:: 怪朋友。
我有兩個朋友,一男一女,都是神出鬼沒的,意思是指他們都愛失蹤。有時失蹤半個月,有時失蹤半年,甚至更長時間都試過。

他們有個共通點,打電話來就入正題,鮮有寒暄的情況,以為他們開口就是借錢,咁就錯晒,佢地富貴過我,掉返轉問佢地借都仲得。

先講女的,最近打來是隔了五個多月,一開口就問「我唔想做喇!而家公司有個好麻煩既女人,我只簽左份簡單的約,可唔可以即走?」佢五個月前打來問過到底翻唔翻兜呢份工,之後就音訊全無,直到我再接到呢個電話。




而男的,早兩天的下午才接過他電話,無論是早午晚定宵夜,開口第一句就問「食左飯未」,每次聽到呢句我都禁不住要鬧佢「俾點新意得唔得」。記得上次來電是天陰而導致他的「自我愁雲慘霧症」爆發要打來訴苦,讓他有個傾症對象,他的病就會好。今次就傾訴遇到幾位心儀對象都屬霧水,說一位年紀比他大 (都大唔到幾個月),又說另一位與他一樣有「自我愁雲慘霧症」,怕兩股怨氣積聚會太難抽身喎,而最後一位就是條件大好而不感太親密。我聽完「呵」一聲就帶過,唯有叫他再接再厲,男人到四十都仲有大把市場咁喇!

我唔敢講他們是我的最怪朋友,但最起碼我接到他們的怪電話時係覺得開心的,雖然有說近朱者赤,但我希望不會是你們的怪朋友吧!

其實,怪朋友都有可愛的一面。
[PR]
by karvitz | 2012-06-13 23:12 | :: 日記仔女
<< :: 中環加記。 :: 一週食生活。 >>