:: 撞到嘢?
在 Office 做做下野,突然間諗起最近一次 (亦只有一次的) 撞鬼經歷。

都已經差唔多八、九年前的事,一班同事去太嶼山宿營 ,渡假屋早已 book 定,但同事老公就嫌渡假屋太遠碼頭而唔肯住,點都唔肯住。之後搵晒近梅窩碼頭的渡假屋都滿客,成班人最後走到比銀線灣酒店更遠的一間小酒店,租了最後一間的二人房。五、六個人就迫埋響呢間二人房,真唔明當年同事個老公點諗樣? (sorry … 係點諗野先岩 ^-^)

當晚我根本無位瞓,跟另一個同事借咗酒店部單車四圍踩,由凌晨點幾踩到三點幾,整個碼頭的小區都好靜,兩丁友不斷踩不斷踩直到踩到去個公園,我霎眼見到有個阿婆坐在木椅,頭向前垂低,頭髮完全咁披著塊面,睇唔到樣。凌晨三點見到咁款既阿婆,仲要係大嶼山(大嶼山應該比市區少露宿者吧),唔多唔少都驚驚地。




同行的同事都望到呢個黑影,大家互相問問就自圓其說「大家都見到,仲咁實在,應該唔係喇!」之後我地兩條友立即踩返酒店,是但係間房搵個位瞓就算。

好彩,一覺瞓到大天光,而且第二日都無病無痛。

準備離開大嶼山前,我們重回那個公園,跟同事輕輕地瞄咗一眼花園那個位 – 空無一人。那一刻,我跟那位同事都加快咗腳步行過呢個位……

夠唔夠驚?唔知點解今日會突然諗起呢,但到今日為止我都仍然係唔信那個阿婆係 __ ……… (那個字,自己填上去吧!)
[PR]
by karvitz | 2012-07-26 22:37 | :: 日記仔女
<< :: 台灣.墾丁篇.二 :: 2012 音樂結集.十一 >>