:: 大家樂。

d0039085_2552364.jpg
吓!大家樂都打食評?




你有幾耐無試過一家去大家樂食飯?初中年代,老媽仍是職場女子,有時收工晚了趕不及買餸煮飯,佢就會一個電話叫晒全屋人去商場的大家樂見。嘩!有得出街食飯,成班嘩鬼梗係開心喇,當然包括我!你睇下,細個幾咁容易得到快樂。

我記得一家人已有段時間無去大家樂開飯,不是因為老媽變了半職場女子而多了時間煮飯,而是一班細路的咀開始刁了,食大家樂?不如落香港仔食泰菜或酒樓晚市喇!之後再加多句「大家樂都唔好食。」

係喎!大家樂真係唔好食喎!主打什麼牛扒根本無味!所謂的伴菜淡是清水烚的!排骨菜飯就簡直是重大災難事故!但以上種種,放在十幾年前,一家人圍埋坐在白色的長方檯,你夾下我塊牛扒,我又夾下你碗菜飯,我認為此情此景的大家樂才是她的最大賣點。

早幾晚老媽無煮飯 (懶),細佬妹又出晒街,老媽就提議不如上商場的大家樂食。嗚嗚….. 你應該知道結果!牛扒無味,酥皮湯個酥皮又軟淋淋,以前的焗薯變了煨紫芯蕃薯(!),鐵版又凍冰冰咁…. 真係唉~~~ 但無所謂喇!老媽提議的,再難食我都覺得 OK,最緊要係大家開心!

唔知呢一篇可唔可以當食評呢?哈哈 :P (唔係講笑喎,openrice 真係有大家樂的食評架!癲!)
[PR]
by karvitz | 2013-02-07 23:44 | :: 日記仔女