:: 百物騰貴。
幾年前睇過篇報導,講及惠康所賣的定價偏高,其公司發言人大概講過以下一段話去解釋:
「公司本身都有做好多優惠,例如日日賞,簽信用卡回贈及儲印花等等,拉勻定價其實唔算高。」

唔!原來羊毛真係出自羊身上喎。

今日買早餐,發現聖安娜又加價。

輕飄飄的朱古力菠蘿包由六個半逐步逐步加到今日的七蚊,想杯葛但早餐無可能唔食,再加上附近再無麵包店的選擇,所以焗買。付錢時,如常地 show 張信用卡拎個折頭慳返少少,點埋單個數竟然同以前係一樣喎!點解呢?難道我眼花?

後來姐姐同我講話「恒生信用卡有 85 折」,之前用開就得 9 折!哦!原來加價是為了補貼呢類所謂信用卡的著數。

信用卡優惠愈來愈多,折扣愈來愈大,但實情只不過是抬高咗個價再折返俾你,呢種算唔算做生意的偽術?

突然間,我覺得唔識用信用卡,要用真金白銀買嘢的公公婆婆好慘,間接地成了被蠶食的一群,慘。
[PR]
by karvitz | 2013-03-27 23:45 | :: 日記仔女
<< :: 放假。 :: 四十小時火車之旅.北京篇 >>