:: 去旅行。

有位已經轉部門,愈做愈高層的舊同事打電話來,一開聲就問「知唔知申請特區護照要幾耐?」我答「點都要一、兩個禮拜喇!」細問原來是 BNO 不見了,取而代之不如申請特區護照。但點解又要咁急呢?因為老細突然批咗十日大假俾佢 (其實佢申請咗放假好耐,但之前太忙就一直被拖) ,佢見有假期就想立即離開香港,但無時間準備自由行,唯有剷上旅行社見團就報,揀好了落晒訂之後返到屋企就出現我之前所講的情景喇!

咁都好彩,佢三個星期後先飛歐洲,呢一刻,本特區護照已經在佢手,唔使煩。但我想講就係,俾你上到中高層,事業創到高峯後,有某些情懷或心情是必定會失去的。就例如用充分的時間去準備一次長途旅行又或是陪自己的小朋友走成長路咁....

所以,無志氣都係咁講,我寧可做個有自主空間的小職員,都不想當個無晒私人時間的高層人士,有錢有地位咁又點,但無咗自己,呢點先係最慘。
[PR]
by karvitz | 2013-06-23 23:14 | :: 日記仔女