人気ブログランキング | 話題のタグを見る

:: 《Sex and the City》

        

第一次接觸《Sex and The City》應該是從明珠台十二點幾的時段。已經唔記得幾多年前,只記得當年播呢套劇出街,電視台+尺度好似突然間寬鬆咗,耳目一新,感覺好特別。

四個不同性格的女人走埋一齊,在紐約尋愛尋快樂,難得的是她們的友誼永固,就算嘈交都唔係嬲得耐,有時你窒下我,有時我又么你一下,幾好笑同時又幾寫實 (人到中年的現代女性尖酸刻薄款)。

一別幾年,戲外四女子卻因分贓唔勻 (當然話係傳聞),電影版一拖再拖,等到頸都長終於都在今年面世。

《Sex and The City》其實都可算係一個集體回憶,大家一齊和 Carrie 痛過愛過,陪 Charlotte 哭過,為 Miranda 灰心過,當然唔少得與 Samantha 開心過。如果有追開兼愛《Sex and The City》的連續劇,呢齣戲一定唔可以走雞,無論套戲幾差都好,算完了一個小小的心結。

情節唔多講,睇 Yahoo 電影簡介都已經可以。不如數下我喜歡的幾幕…….

:: 開場的回憶錄 – 用書本的 Chapter 及電視劇的片段帶出四個女人的過去。好集體回憶,見到佢地四個的轉變,已經好興奮好想繼續睇。

:: 在舊居試身扔衫的一幕 – 好開心見到那條芭蕾舞裙,即係電視劇開首一幕Carrie 著住那套,很玩味。

:: Carrie 在除夕一夜搭地鐵去找Miranda 的一幕 – 好深深體驗到朋友的重要性,人生低潮總會有,但朋友的實質支持真係最緊要。

其實仲有好多幕都好好睇,Samantha 為了男朋友而放棄了原本放縱的生活,Mirada 與丈夫離合後的和好如初,Charlotte 終於懷孕,Carrie 終於嫁咗俾 Mr.Big ,以上一幕幕的情景,如果無追開《Sex and The City》,個感覺應該唔會好大(而且唔覺震撼) 。

但就係因為電視劇那條路鋪好了,一幕幕電視劇出現的遺憾在電影版上一掃清,大團圓結局,但又唔算行貨地埋尾,已經算交足貨有突。
by karvitz | 2008-06-13 00:22 | :: 日記仔女