人気ブログランキング | 話題のタグを見る

:: 美日之旅 (2.5) - 一「日」遊

日本時間:
一三二零 (六月二十一日)

        
  :: 轉車到淺草,終於見到呢個大紅日式燈籠。電視見得多,但之前無來過。::

見到好多嘢賣,人形燒唔算貴,仲可以用抵買來形容。可惜有得睇無得買,食用期只得三日,未返到香港都已經發霉。

        
 :: 有得睇,無得買。朋友們,想要日本手信可能要等下次啦 (可能係十年後 XD) ::

        
     :: 行完掃貨街就見到呢個大紅門,同樣好面善,好旅遊特輯啦!::

        
      :: 日本 903,呢個景點應該唔少去過淺草的朋友都見過。::

行完淺草,下個站係新宿。

新宿,聽得多但未去過。嘩!人多車多店多,咩嘢都多。再加上假期關係,到處都逼滿人,其實行得幾辛苦,但始終都未來過,新鮮感大過一切,辛苦就辛苦啦。

        
  :: 痴鬼線,在新宿排隊買個甜甜圈要排五十分鐘,咁辛苦,我寧願唔食啦! ::

其實一直都想行Uniqlo,由起點池袋已經想搵(後尾搵到),但遍尋不獲,深深體驗到愈想搵愈期待的就愈唔會出現。最後在行到人都癲的情況下,在轉角位終於都搵到一間超細超多人的。

呵!估唔到,搵咗咁耐,最後都係行咗十分鐘都唔夠,無咩嘢賣再加上人太多,最後只好孑然放棄,走去嘆返餐好,對自己好少少。

有海鮮敏感的我,海鮮都儘量少食 (其實都慳唔少)。瀨尿蝦為最毒排行榜第一位,龍蝦都應該係第二。蟹雖然唔在Top 5 位置,但我儘量都少食,因為剝殼麻煩加無咩肉食,所以寧願唔食都唔攪一大餐。

        
    :: 打開個餐牌,個個餐都鬼咁靚,無咩考究過就點咗個貴小小的。 ::

一早就聽過蟹道樂,北海道蟹之專門食店,今次諗住人一世物一世,點都要試下。六點前已經走上去新宿店,食客唔多,坐住日式位慢慢嘆最好不過。

        
 :: 刺身活蟹腳,只得兩大條。是眾多蟹中最好食的一部份,真係小食多滋味。::

        
        :: 蟹膏蒸蛋,蟹膏味濃,我食唔慣都覺得好食。::

        
      :: 芝士焗蟹肉,芝士味好濃,份量剛剛好,太多就會好膩。::

        
       :: 鹽燒蟹,好咸,但又出奇地與淡淡的蟹肉好夾,好食。::

        
        :: 蟹肉壽司,我覺得好普通,相比之下的最差蟹作。::

        
  :: 抺茶雪糕,真人開抺茶,苦的暖的抺茶加上甜的雪糕,賣相絕好又好食。::

食飽就帶著累到死的肉體返酒店,仲要遇正落雨喎,返酒店沖過涼之後冒住雨都要衝落街行下便利店,掃返小小零食準備明天十個小時的航程,希望有點咬口,可以令時間容易過小小。

                ※ 第二日完 ※
by karvitz | 2008-07-08 21:14 | :: 到處留情