人気ブログランキング | 話題のタグを見る

:: 美日之旅 (3) - 去.舊金山.去

日本時間:
零八三零 (六月二十二日)

又瞓醒,都差唔多係時候離開日本。快餐精神繼續延續,今次去咗與香港格調完全不同的肯德基。池袋的星期日早上比昨晨更加冷清,店內坐著的大多數都係後生仔女,三五知己圍埋一齊玩PSP,呢個情況與香港的又幾相似。

        
         ::冷冷清清的池袋,人不多,四圍行都唔焗促。::

早餐的選擇不多,但完全唔係香港的用薯寶、炒蛋做主菜。

        
:: 鬆餅 (口感似牛角飽) 夾芝士煙肉,感覺幾特別,細細個飽,份量只係剛剛好。::

        
       :: 鬆餅夾火腿蛋加茄汁,旅伴嫌個飽細個唔夠飽肚。::

吃飽後就準備離開日本,今朝一直都落雨,拖喼非常唔方便。呢次試搭電車去機場,上車頭十五分鐘都感覺良好,但愈坐就愈焗,冷氣唔夠之餘,架電車又好「浪」,攪到成個人都作嘔作悶。唔只我一個人出現呢個徵狀,旅伴同樣覺得辛苦。

熬咗一個多小時終於都到機場,吸返兩啖新鮮空氣,成個人都醒返,真係好彩。

夠鐘就上機,邁向美國之途終於開始。幾年前的澳洲之旅,八個小時的航程雖然唔算辛苦,但始終瞓唔到,感覺始終難受。

        
        :: 無目的地向前走,前後左右都係海,好孤獨喎!::

        
      :: 帶埋 NDS 上機,充足電上陣,一邊玩一邊等時間過。::

實在太肚餓而飛機餐又太好食,未來得及影相已經食晒落肚,無紀錄。玩下瞓下醒下地聽咗六十幾首歌之後,機艙終於開燈,即意味差唔多到站,實在太好。

        
     :: 呢個圖表明晒我身處的地方,下面係海,前方就係阿米尼加。::

美國時間:
零八五五 (六月二十二日)

搭咗十個鐘頭飛機,抵三藩市時間係六月二十二日,朝早九點鐘,又係另一日的六月二十二日。

終於都抵三藩市,一切都好新奇。過關比想像中順暢,旅伴說是因為航班太早,未在繁忙時間。

一路上也在緊張過關及檢查的程序,聽說安檢非常嚴密,而又會被查家宅,好怕。點知!關員只問咗兩句,我連Sight-Seeing 都唔使答就過關,而入境檢查就好似過羅湖邊境一樣快捷,真係遠超預期。

好彩旅伴都算係半個地頭虫,由坐無人駕駛到攪租車都非常Smooth,拎到車埋位都係十點鐘。

三藩市都算一個幾特別的地方,陽光大普照的情況下,自然風吹埋來竟然係似冷氣風,好舒服好醒神。

        
     :: 路…一直都在,是形容從機場出發往三藩市中心的國道101。::

              :: 我.終於都到美國了。::

                ※ 第三日半完 ※
by karvitz | 2008-07-09 21:05 | :: 到處留情