人気ブログランキング | 話題のタグを見る

:: 美日之旅 (6) - Las Vegas II

美國時間:
一零三零 (六月二十五日)

昨晚咁夜瞓,今日當然要瞓到夠先起身。

望一望個電視,雖然無 42度咁高溫,但相對濕度就只得11%,係11%!乾燥得好犀利。因為之前無做任何防護措施,一覺醒來,手踭位已經出現紅腫現象(痛),不只我一個出現同類情況,後來返到香港過咗三幾日先完全好番。

最後十點幾出發,去一試酒店的自助餐。(好出名,好多酒店都用自助餐作招徠)

今次揀一間中價的(Excalibur) Lunch Buffet 一試。哎呀!食物質素一般都算,但我以為那種只有中國人才有的「搶得就搶」性格,原來呢邊都會感受到。呢一餐us$11.99,純粹買一個「在賭城食過自助餐」的證明,都算值得試的。

       
         :: 呢個菜湯係少數可以Encore 的食料。::

       
:: 好彩,最愛的凱撒沙律都算唔錯,只係芝士用咗下價貨而味道有丁點唔同。::

       
    :: 自助軟雪糕,味道都係差小小,夠晒凍但唔夠香港好食。::

之後未完的繼續Vegas 之旅。在威尼斯人前面就係Wynn (永利),酒店的建築方式一模一樣,但襯托的就由澳門的噴水池換成一個小型花園。咪睇少呢個花園,一個出現在沙漠上的花園,背後隱藏的力量幾大,不可看輕。

       
       :: 前面的小庭園就是澳門店與 Vegas 的分別。::

如果各位唔係自駕遊Vegas呢,要坐交通工具來往呢條五光十色的大道就只有我所謂的觀光巴士 – The Deuce。呢架巴士可以話係我坐過咁多種巴士最恐怖的,巴士的設備其實非常完善,但乘客素質卻十分普通。

話過你知,埋一個巴士站往往都要用上15分鐘的時間,點解?

1. 因為好多人搭車。
2. 如果即俾車費,佢地的做法係要將紙幣逐一入機 (即係好似地鐵用紙幣買飛)。萬一張銀紙被「攝」住或過唔到機,攪來攪去就會塞住車頭,塞住整條排緊隊上車的人龍。
3. 如果用一日票,其實好多人買咗都唔識用,上到車先問司機,又阻住時間。
4. 可能美國其他地方唔興雙層巴士,好多乘客都死迫爛迫在下層 (而且佢地份量大),上層大把位都唔會上來坐,攪到司機要開咪奉勸。

就係以上幾點,停一個站要15 分鐘,對於我呢隻唔可以停下來的香港人,你話係唔係人都癲。但有一點值得讚的地方,有部份巴士司機會一邊講笑話,一邊報導下個站係咩嘢地方,睇得出佢地 Enjoy 份工作,唔錯。

迫咁遠巴士,都係想去Vegas 的 Downtown。呢度曾經非常黑暗,真係罪惡的溫床,大概就似澳門十幾年前的葡京一樣。Downtown 其實一條街就行晒,中間有個白色天幕,夜晚會有show 睇,聽聞幾好睇。街的兩旁理所當然係賭場加酒店,呢度明顯比出面平民及下等一些,無咁浮誇。

       
    :: 一路上,見到「些粉」兼埋油站來做,好新奇,些粉油站。::

       
    :: 大白天的天幕日頭睇平平無奇,但遮太陽就一流,唔使曬。::

       
        :: 呢度的賭場主要用霓虹燈來吸引百客。 ::

       
      :: 另一間賭場的大門口,呢間的外貌好有熱帶味道。 ::

因天氣實在太熱,來回只走了一轉便打算回府。返歸的途程上又要搭人多到爆的巴士,又繼續塞車,真係麻煩。輾轉返到酒店,望住出面的太陽威力,真係唔想再出去。

晚飯時候到,已經再無力氣出外面開餐。就近地去咗附近的美式餐廳 AppleBee's (大概與香港的Outback 及 Ruby's Tuesday 同等),終於都等到食扒啦!

       
:: 呢堆係Chop Steak加薯條,好好食,食到好飽,好滿足。價 us$12.99。 ::

       
             :: 夜攝 AppleBee's ::

食飽,最好不過當然就係返酒店大覺瞓。

                ※ 第六日完 ※
by karvitz | 2008-07-21 21:10 | :: 到處留情