人気ブログランキング | 話題のタグを見る

:: 攻劇策略

» 午夜場的《十月初五的月光》終於劇終。

講真,個故事其實都幾老土,初哥哥的角色討好,注定會大熱。佘詩曼初擔大旗好明顯未夠班,但就係呢種青澀,同角色都幾配合。我追睇,係因為唔記得個結局係點,我一直都覺得係老土式的大團圓收場。點知一個屈尾十,個結局竟然有驚喜出現。

1. 依文最尾都係飄泊一生。
(無因為要就劇情而同老媽和好,我覺得呢段幾好。)

2. 海琳單親帶大與沛堅的遺腹子。

3. 君好同司徒禮信真係開心快樂地過日子,仲生埋小朋友。
(仲以為佢會念念不忘初哥哥)

4. 最後,當然係結尾在樹林用哨子相認的一幕,好淡然就完場出Ending。
(幾有意味,可惜佘詩曼未交得足戲,差小小)

講真,當年《十月初五的月光》都真係好紅。張智霖拍佘詩曼呢個組合可以發展到電影圈,真係犀利。如果要再數一套劇係用青春掛帥而我非常情迷,即刻諗到就會係《新鮮人》,呢套劇真係值得拍爛手掌支持。

» 接住重頭劇之後的《與敵同行》。

第一集就講獸父謀殺頂正坐監出獄報復一集講晒,劇情就去得咁快,仲有十九集喎,點捱?我終於見到鄭嘉穎有戲上身,雖則未渾身是戲,但相比起《天幕下的戀人》就一定好十幾廿倍,值得捧場。仲有,呢套劇玩「疑心生暗鬼」,呢類心理遊戲其實可以拍得好好玩,但無記劇,都係唔好抱太多期望。

» 仲有《蘇 Good》新上架喎。

但查實就照搬有線的《一粒鐘真人Show》,拍攝方法及人腳都幾齊,有聰明人在後,泰山又回朝,幾期待。仲有唔怯場的埋位就講,連自我介紹都慳返,夠姜。可惜得半個鐘頭真係唔夠喉,斬頭斬尾咁not so good 喎!希望做下做下上返軌道,保持返有線水準就已經夠晒。
by karvitz | 2008-09-23 21:06 | :: 日記仔女