:: 飛機餐 - 兩回

黃偉文自稱為「嗜吃飛機餐的怪胎」,一個自命有要求 (其實可以話佢奄尖挑剔揀擇) 的人,都為飛機餐著迷,可想而知,飛機餐真係有一定的吸引力。(但當然,我明白,就算幾愛飛機餐都好,敢講阿黃生見到一般經濟艙的飛機餐都唔會有興趣。)

對我來說,每一餐飛機餐都是驚喜,雞定牛,飯或意粉,奄列定沙律,有得揀,其實個感覺都幾好。不如咁講,我預期的飛機餐其實只會有水果、麵包、飲品及熱葷一碟,就係咁多…… 如果個飛機餐有埋雪糕、芝士蛋糕、朱古力的就已經是驚喜,仲要係十級驚喜。

商務呀!頭等呀!呢類遙不可及的名詞,離我其實有好一大段距離,無諗過會有機會坐,但實際上卻有一次,真係有一次,差小小就上到頭等,個情況真係好似足球的貼籠門柱邊出界咁近。

上唔到頭等唔緊要,我唔會奢求,我望下個飛機餐都已經開心。平時搭開經濟的你同我,今次準備好未,Upgrade 一次上商務及頭等,感受下Wyman 所感受的高級飛機餐,到底係唔係真係咁吸引。



數精緻及賣相 –日本主理的航空公司真係玩晒。


ANA 飛機餐 - 1


ANA 飛機餐 - 2


JAL 飛機餐

驟眼睇,根本與高級和食無分別。大堆頭,編排有心思,你話咁樣的飛機餐,有邊個唔鍾意呀!(除非你已經日食夜食高級食材啦!) 再望真,龍蝦、牛扒、魚籽等等排住隊出場等你點,唔心動就有鬼喇!睇相都正。

講真,日本人對包裝的要求應該係全世界數一數二,如果連佢地都做得唔好,其他國家都唔好望會做得好。


本地貨,國泰飛機餐 - 1


德國漢莎航空飛機餐


本地貨,國泰飛機餐 - 2


美國貨,大陸航空飛機餐

相對日本的,以上來自各國的始終都會覺得差幾皮。無論在賣相上,定抑或在食材上,都有同樣感覺。但如果有得我揀,星期六飛出去的那餐飛機餐,俾上面是但一碟我都已經好滿足。


係。兜咗個大圈,先後講咗兩次飛機餐,無非都係想講俾大家知……

我又飛喇!下個星期見。拜拜。
[PR]
by karvitz | 2008-12-11 23:43 | :: 日記仔女