人気ブログランキング | 話題のタグを見る

:: 韓城遊 (四)

(雖則停咗成個月,但無理由就咁爛尾,繼續。)

首先講一下呢間商務式酒店先。


好簡單的裝修,但絕對有家的感覺。加上地板有暖氣,好舒服,住得好稱心。



今日係最難過的一日,因為隨團的賣豬仔購物時間終於開始。先係買泡菜,再被帶到去影韓服相。跟手再來化妝品城及人參專賣店。(悶到傻,好彩同團有個小朋友玩。) 最後一程係水晶特賣場。(同場有好多泰國人及大馬掃貨,勁!)




普通團餐,豬肉鐵板燒加石頭飯。味道都唔錯,豬肉醃得唔錯又好送飯食。

半日過咗,另外半日就係自由行的時間。導遊帶我地去到明洞入口之後就解散,一輪腥風血雨的銀包割喉戰又再展開。

好難係香港可以搵個地方似明洞,因為又要大牌子大商場,而同時又要有小販檔,香港好似無喎!就係因為咁,所以中低高價貨品都有,任君選擇,總會買到合適。


巧遇聖誕節前,到處都有燈飾兼人頭湧湧,非常熱鬧。

明洞出名的長條軟雪糕,天氣凍關係,軟都變硬,食到飽晒!

都未行完一條街,我就已經買咗一袋,朋友又兩小袋化妝品 (特價喎)!再行多兩步,又見到化妝品,又貢入去喎,話未幫朋友買齊嘢喎!再行過一條街,又化妝品喎,呢間未行過喎,又掃。間間停,間間睇,真係拎命。好彩我快手快腳可以四圍睇完行埋自己想行的鋪頭,唔係等到等到癲呀!

食晚飯,中場休息。


走入一間西式快餐店開飯,朋友點的披薩比較乾身,味道一般。


我點的豬扒飯,大件豬扒抵食,跟套餐汽水任飲,唔錯選擇。

就咁望埋去,四個人起碼買咗有十袋野,衫褲鞋咩嘢都有,全因韓寰跌得太厲害。就如係便利店買枝果汁1000W,二月份兌返港幣要$8.3,而家只係$5.6,足足平咗30%,再加上韓國呢個時間又做大減價,一來一回計,一件原本10000W 的貨,折咗6000W,即打咗六折,之後我地仲可以平多30%,唔狂掃貨就真係有鬼喇!


朋友的手信袋。如果一齊計,化妝品總和應該有 5 袋上面見到的,真係痴晒線。

食飽飯行多兩個圈 ,就嘗試搭地鐵返酒店。

首爾地鐵唔算難搭,係個路線圖比較錯綜複雜,只要用心睇,應該會避免搭錯車轉錯線的情況。在地鐵車箱見到一般韓國男女都比較高大,懂得打扮之餘仲著得幾好睇。

咁又一日。

- 續 -
----------------------------------------------------------------------
韓夜宵系列 (三):


冬甩做宵夜,好味到飛起。薄薄的糖面加埋「煙韌」的粒粒,雖然明知道肥到死,但都無辦法,太好食喇。
by karvitz | 2009-02-05 21:11 | :: 到處留情