人気ブログランキング | 話題のタグを見る

:: 馬尼拉.蘇碧灣.三

{蘇碧灣.菲律賓}

蘇碧灣曾是美國的海軍基地,環境面貌極像美國的小鎮,遊記及旅遊資料都比馬尼拉的更少,靠自己摸摸碰碰,試下到底要撞幾多次板先能安全抵達。

首先,我要知道自己的位置。Pasay 是酒店附近一帶的區名,當地人會說成「巴西」,而一條大路 Taft Ave. 的盡頭是另一區Cubao,當地人會說成「古巴」,又巴西又古巴,環遊世界喇!



呢一程會搭上冷氣大巴穿州過省,由Pasay 到 Olongapo,車程大約三個鐘。菲律賓有十多間這類的大巴公司,不同公司走不同省份,路線重覆不多,算易認易搭。一路上到巴士總站,沿途都會見到不少無冷氣加破舊的大巴在等客,擠迫的車廂加埋炎夏天氣下身體發出的汗味,你都咪話唔難頂。

22032009 - 0630
四點就醒,唔講點解....總之人都癲喇!哈哈!死捱難撐咁到六點幾,落樓下食早餐,酒店有提供的。


:: 呢個早餐,陳生食咗一日就被嫌棄。(其實唔算太差)

22032009 – 0800
食飽早餐就四圍行,搵下遲少少會搭車落蘇碧灣的巴士總站。


:: 朝早的陽光非常似黃昏,感覺好奇怪,但我就好喜歡呢個 Moment。


:: 一早就見到醒神加油員,見到我有相機就不停就要 photo photo :P

22032009 – 1000
開車,有十多個乘客,冷氣夠涼,應該會幾暢快。


:: 巴士外貌


:: 唔好睇少呢張嘢,保單來的,買重 P5 保險的。(即係唔到港幣一蚊)

小解: 呢類大巴與國內的直通巴士差不多,單程車費 P210 ($35) 已包括保險費用。雖然無錄影車上乘客的專容,但就有一位駐車車長,沿途記晒所有乘客的目的地,到站就會提醒你落車,幫你拎埋行李不突止,而且仲禮貌十足,睇得出真係有心去做。

22032009 – 1330
抵 Olongapo ,一落車的感覺雖未至於落後鄉鎮,但感覺上比馬尼拉落後,小鄉鎮的一條大街最旺場,街市食肆銀行全部有齊。



22032009 – 1400
坐咗三個幾鐘頭車,人都呆晒,揀咗最地道最有名的快餐 Jolibee 為午飯,不過不失。


:: 意粉比想像之中好,其他嘢..... 快餐味囉!

22032009 – 1430
繼續行程,由 Olongapo 搭 Jeepney 可直達蘇碧灣的自由港 (Subic Freeport) ,在 Freeport 前有個閘 (gate) 有警衛駐守,感覺上是防止菲律賓人在自由港亂竄,但實際上卻未見過有人被拒入「港」。


:: Freeport 的其中一個閘。

小解: 從Olongapo 走進蘇碧灣自由港的閘口,可乘最搶眼的黃色 Jeepeny,通街都有,但記緊認清方向,搭錯車走錯邊就麻煩。


:: 就係呢架黃色 Jeepney,通街都有,幾夠搶眼。

22032009 – 1500
過閘後,眼前望到的都是矮矮的樓,街道乾淨,人煙不多,驟眼望真的有美國小鎮風情。望住大地圖,老友及我都毫無頭緒自己到底身處那方,最後唔理地圖,亂咁行亂咁走,我唔信搵唔到落腳的酒店。


:: 美式的招牌,亂行行到去空無一人的網球中心。

小解: 因Jeepney 不能進入蘇碧灣自由港,所以自由港的交通就只有的士及疏落的巴士。如果唔想行,我覺得的士絕對係最佳選擇,但就必須知道自己一定會做咗羊牯,俾人劏得就劏。

22032009 – 1630
三十六度高溫,無遮無擋在烈日下曝曬,再揹埋背囊四圍遊,都咪話唔辛苦。同樣地,當地的市民 (包括警衛及保安) 都非常熱心,有問必答,才可以確立自己的路線,無走冤枉路。



22032009 – 1700
終於找到了 Subic Park Hotel,座落海邊的最前方,在 Waterfront Road 的盡頭。入到房唔理三七廿一,最先想做的就係沖個涼,洗走臭到死的一身汗味及Refresh 一下自己。


:: 酒店對出的沙灘 - Moon Bay。

22032009 – 1800
醒晒後,立即換過行裝再出門。在自由港繼續亂遊,人少到在街跳又得,瞓都得。之後走返出去 Olongapo,我行市集睇地道風情,佢地當地人又好似睇珍禽異獸咁睇返我地,都幾好笑。


:: 街市的一角

小解: Olongapo Market 佔地唔細,有蓋的地方賣乾貨,濕貨蔬菜魚肉蛋就擺在外圍賣,感覺就好似小時候秀坪街市咁,好混亂,但你就會見當地好多的地道嘢!但如果你係怕 / 驚唔友善的目光,呢個Olongapo Market 絕對唔適合你行。但如果你知道佢地都係出於好奇心,你自然就會放低咗有色眼鏡。


:: 其實我幾喜歡呢個 Olongapo Market,有點似細個時生長的地方。

22032009 – 1900
天開始黑,是時候返回自由港。在入港前的最大型商場買咗五個冬甩當宵夜,有名的Donkey Dount ,總計都係 P68 ($11),抵到爛。但查實呢次已經係我第三次在菲律賓買冬甩食,實在太抵買太忍唔到手。

22032009 – 1920
返入酒店前,見到竟然有個市集及嘉年華,可能是星期日的關係!到處都好旺場,又有嘢睇又有嘢食又有嘢玩,唔錯喎!


:: 小朋友玩緊猜枚拎獎品。





小解:呢個嘉年華,就好似《飛越未來》 裡面的一樣,好簡單咁有海盜船、摩天輪及小型吊車等玩意。但呢個菲律賓版就少咗玩遊戲拎公仔呢種Game,反而就好現實咁加咗幾張賭枱。有魚蝦蟹簡化版,用顏色來代替咗魚蝦蟹,一蚊又玩得,五百都玩得,最緊要你肯賭。幸運地、撞彩地、隨意地贏咗一百蚊就收手。


:: 賭枱一張,歡迎埋來玩玩。

22032009 – 2000
酒店包埋晚飯,簡單的肉醬意粉無咩特別,但整得唔難食就已經覺得賺咗。同場老友另加的芒果Shake 就好正,親眼見到用新鮮芒果 blend 出來。而我杯朱古力Shake 都好正 - P60 ($10) 完全係抵飲。



22032009 – 2030
竟然電視有賽馬直播,兩條友睇住部電視嘻嘻哈哈,睇賠率又笑睇馬又笑,最好笑都係馬匹入閘的前三幾分鐘係會不停咁播音樂,無人聲評述的。如果換轉在香港,嘈到拆天都似。

22032009 – 2100
嘉年華都有得賭,呢度點會無賭場呀!時間過咗九點,商場鋪頭開始關門大吉,賭場就係呢度比較正規的夜生活。賭場面積當然唔可以同澳門相比,呢邊主力玩老虎機及百家樂,兩樣我都無興趣。難得有部電腦操作的百家樂機,最低下注都係P100 ($16),咁兩條人就分別坐咗玩咗大半個鐘頭。最後玩呢個 Game 贏咗P307 ($49) ,唔錯唔錯。

22032009 – 2230
以為玩完?仲未喎!間酒店個泳池開到十二點,游下夜水影下相先再瞓,極度盡興。


:: 深夜的泳池景。

:: 待.續。
by karvitz | 2009-04-09 23:07 | :: 到處留情