《Love Mi》

已經踏入三月,本地樂壇依然靜如深海,新推出的大碟寥寥無幾。近期聲勢最浩大的算是鄭秀文的信望愛三部曲的最終章《Love Mi》演唱會全紀錄。猶記得鄭秀文在《Show Mi》演唱會的錄音,不只聲沙,而且氣量亦都不足,久休復出是可以原諒的藉口,而這次《Love Mi》 則準備十足,如果依舊是《Show Mi》的水準,咁我寧願Sammi 繼續呢種半退出的工作模式,應該會更適合佢。



演唱會的亮點有〈給自己的信〉,鄭秀文絕對 Level up 咗首歌,尤其自改的一句「突然廿年又過去」最為感嘆。副歌雖然甩漏都幾嚴重,但感情分已蓋過一切,加上保留原曲的 C 段,加晒分。但跳舞部份我卻覺得有點行貨,來來回回都是那些指定快歌,〈獨家試唱〉有些驚喜,接〈星秀傳說〉就已經有點悶,我認為可以唔覺意攝半首 side track 落去,如《Show Mi》駁咗半首〈神奇女俠〉一樣。下次攝一攝〈旋風〉或〈永遠都不夠〉,我諗歌迷們一定會好歡喜。



〈上帝早有預備〉唱得好唔穩陣,個 Key 是否有問題?〈信者得愛〉的MC Jin 的臨場表現比 MC 仁好,氣氛帶動得好,而且 ad-lib 絕對幫到首歌。〈不要驚動愛情〉比Moov Live 差,可能是已經連唱十晚的關係,〈親密關係〉、〈默契〉及〈唯獨你是不可取替〉都好甜好膩,可惜是Sammi感情都仍然未有著落。說實在,只聽Sammi 的聲音已不及高峯期,現在的就只有靠勁歌熱舞及感動性強的演出來帶動,雖然不是十全十美,但樂見 Sammi 脫離病痛而步入正軌,呢種勇敢的行為是值得敬重的。

聽說新年期間,後生仔屋企用來宴客的節目,不是《是但嗡》就是《Love Mi》演唱會,看來這一次影音產品跟演唱會一樣又大賣喇。
[PR]
by karvitz | 2010-02-28 23:50 | :: 有歌而發

:: 知識多.II



大家應該知道什麼是巴士迷?

話說二月八號朝早起身返工,巴士如期地在八時多埋站。離遠望「咦!點解架巴士唔同咗樣?」(因為這班巴士比較疏落,行呢條線的巴士就來來回回的三幾架)。就連其他熟客仔上車都即問司機「點解架車唔同咗,差點就唔認得」司機話「新車落地喇!」

我雖然唔係巴士迷,新車落地對我來說只有丁點興奮。但從沿路一直所見,就不停見到有人拎起相機不停咁影,架巴士真係咁靚仔咩?

:: 繼續悅讀
[PR]
by karvitz | 2010-02-26 21:51 | :: 日記仔女

:: 知識多.I



以前返學用的黑皮鞋,因為懶鬼,污漬多及鞋頭甩晒色都不去打理,閒時只用最簡單的黑鞋水去塗塗抺抺,希望遮得一下得一下,但邊鬼度咁簡單可以攪掂。

今年新年前買了一對靚款黑皮鞋,不想重蹈覆切,所以下定決心要把皮鞋打理的乾乾淨淨。上網一搜,原來出操警察的皮鞋「立立令」,事前「磨鞋」必定要落一番苦功,而磨鞋的方法更有「水磨法」等等大名堂,各師兄弟還稱「磨鞋」是絕對鍛鍊耐性的一個工作坊。

還有,大家熟識的鞋油 (膏) 名牌「奇偉 Kiwi」原來是由 「Sara Lee」出產。什麼「Sara Lee」?「Sara Lee」咪就是莎莉蛋糕個莎莉囉!一邊整蛋糕,一邊就整鞋油 (膏)?呢個配合,真係大纜都扯唔埋喎!而且仲有點離奇。
[PR]
by karvitz | 2010-02-24 22:30 | :: 日記仔女

:: 減肥大計。



上一次的起心肝話要減肥的是幾年前,在澳洲旅行返港後,每個朋友睇完我的旅行照後都話「肥到咁?」。之後我決心就擺咗張相在銀包,警惕自己唔可以再肥。咁當年真係減到,肥包包面變返無咁包,而個肚腩仔都縮咗小小,算是小成功。

話說我家的男士 (包括老豆及阿叔) 都有中年發福的情況出現,用遺傳學來計一計,我發 (福) 的機會絕對大過八成。不幸地,呢個發福警號已經於二零零九年響起咗。見住我個 bb 日漸漲大,而自己又唔忍口不停食,加上一日三餐都在街外吃,運動又再減少的情況下,肚腩一發不可收拾喇!是前所未見咁恐怖,睇來都是時間要整治一下呢位大邪神。

:: 繼續悅讀
[PR]
by karvitz | 2010-02-23 23:47 | :: 日記仔女

八卦音樂

.亞視的打頭炮本土音樂節目,由歌神張學友親自剖釋《Private Corner》專輯,雷聲很大,但最後收視只有兩點,即係只有約十二萬人收看。

《勁歌金曲》雖然收視及口碑都不濟,但都沒有這樣的劣成績。是慣性收視影響,還是張學友在這個新年一下子出鏡得太濫 (十大中文金曲,七十二家房客,雜誌專訪及全城熱戀熱辣辣) ,所以休出特佳的效應失效?

:: 兩點收視?是林曉峰的爛 gag 太爛而趕客,還是大家對香港樂壇已經無興趣?


:: 繼續音樂
[PR]
by karvitz | 2010-02-22 20:25 | :: 有歌而發

:: 華東行.IV

上海篇














.到上海市中心前,先到朱家閣。導遊說是前上海市中心,後來再移到黃埔江邊。感覺上朱家閣就似被遺棄的,四周的高樓大廈不多,樓房亦不見有修葺,但就係咁樣,這個朱家閣才顯得有種舊城味。

:: 繼續旅程
[PR]
by karvitz | 2010-02-19 23:28 | :: 到處留情

:: 林莉。

不是小虎隊的林利,呢個林莉是近日被傳買親上富家老闆屋企短聚、及後被拍到忽然富貴的中環豪買及被傳媒形容為港版林志玲的港姐。

忽然富貴其實都幾大件事,唔俾人知都還好,如果被踢爆是窮底,但忽然富貴豪買兩個賽西湖單位,還口口聲聲說是自己炒股賺返來之後再被踢爆,你都咪話幾瘀。咦!又係港姐喎!

近幾年,我在工作的地區不時遇到一位同校生,年齡比我小兩、三年,他正職應該是地產經紀。我倆不算太熟,但因中學時代住埋同一條村,撞口撞面的機會都不少。所以呢幾年重遇,雖然大家都有互望,但就一直都無打過招呼,因為我連他人姓甚名誰都不知道。

但我都幾肯定,他的老家依舊是在南區。

:: 繼續悅讀
[PR]
by karvitz | 2010-02-18 23:39 | :: 日記仔女

陳小春終於在一零年之始與自摸天后應采兒拉埋天窗,值得恭喜。而過往跟陳小春傳過緋聞的都女星,大多數都是襄王有心,神女無夢,張柏芝就是最好例子。今次有情人終承眷熟,梗係要揀返幾首歌賀一賀佢喇!

首先要揀的是二零零四的〈相依為命〉。黃偉文在《Perfect Ten》專輯講過呢首歌是送俾佢身邊的最愛,當年由陳小春唱的共鳴感不大,但在呢一刻就變得有意義了。



:: 繼續音樂
[PR]
by karvitz | 2010-02-14 23:59 | :: 有歌而發

:: 《緣滿情人節》



大雜燴式的愛情小品,加上各有牽連的人物關係,自《真的戀愛了》出現便百花齊放般湧現。無可口非,珠玉在前,要超越前者的既溫馨又圓滿及窩心,你估真係咁易?

一切都是緣自《Alias》。

電影未上已經叫定朋友入戲院睇,無非都是對電視劇《Alias》的舊拍檔有種情意結。

劇中女主角 Jennifer Garner 在《Alias》中率先突圍,當了女主角幾季後便躍登大銀幕,擔正過幾套大片,但可惜票房不佳,最後淪落 (應該用「淪落」呢兩個字嗎?) 到拍小本製作,當上《Juno 少女孕記》裡面 Juno 的媽媽,恰巧電影大收,又令她有機會上位。

:: 繼續悅讀
[PR]
by karvitz | 2010-02-12 22:12 | :: 日記仔女

:: 敗犬女王



身邊有很多廿多歲都還未結婚的女士,我相信她們一定非常「恨」拍拖,但礙於年齡漸長,Market Value 愈來愈少的關係,要成熟男找一個三十歲的女士拍拖,我相信大部份男士都會眉頭皺,之後會彈出一句「天下美女何其多 為何揀位三十過」呢?

話說有個年約五十的高層,高大英俊,打扮又得體,而且揸法拉利出入,最最最緊要仲係單身。港女們可能會話:「嘩!咁好條件,又未結婚,一定係基佬喇!」咁小姐們就錯晒喇!高層的兩座位法拉利司機位旁的女伴天天新款,有時仲會係電視台的三、四線姐仔。講真,泊到呢個埋高層的碼頭,下半世都真係唔使憂。

:: 繼續悅讀
[PR]
by karvitz | 2010-02-09 23:34 | :: 日記仔女