:: 中藥.上



對中藥認識不多,對中醫師的認識就更少。自小被電視劇影響,以為讓中醫師把脈數次便會得悉五臟六腑的是否健康,雖然神奇,但我卻一直都未試過。

最近身體出了異樣,如「痱滋」(口腔潰瘍) 粒復粒地爆出來,精神不足,牙肉又不定期出血,而同事更說我的眼白有點濁 (呢一項從西醫角度說應該是敏感)。縱合各方面的徵狀,在自行疑難排解之下,得出結論是「虛火」太猛,遂決定向中醫師問一問症。

對於中醫,我有個小故事要插入。話說前年老媽道聽途說有一中醫師法力無邊,有病醫病,無病就可幫調理身體。老媽聽後覺得神奇便跟時常手腳冰冷的細妹去問症,望聞問切後,一人分得兩包藥返屋企慢慢煎。

:: 繼續悅讀
[PR]
by karvitz | 2010-07-29 23:34 | :: 日記仔女

:: SALT



又是飛車爆破反間再反間的特務片。

畢嫂延續其露兩手打真功夫的強悍,劇情不算錯綜複雜,主體是說俄國利用特務去滲透入美國策劃叛亂行動,為期長達十年、廿年。而畢嫂飾演的索特就由小時候已被安排入政府機構工作,之後被招攬為中情局要員。俄領導人的一次發動,索特回復原來面貌,逃跑易容重裝上路為的就是要絕對服從俄國領導的一個殺人指令。

理所當然的大製作,公式化的跳車爬牆走及地道都少不了,新意欠奉,但總算夠晒刺激緊張。到最後暗殺美國總統的情節簡直有點瘋狂,無論是上尉,還是中情局高層或索特統統都是俄國特工,事實真係咁恐怖嗎?而俄特工到最後從新聞得知俄國總理大難不死及已飛返回家的一幕來得特別兒嬉,咁高規格的特務都要利用傳媒來告密,真攪笑。

同類的電影有太多,還以為這次有真俄嬌娃特工曲線宣傳而令到劇情會更有睇頭,可惜一切都是幻象。作為大片,所有需要的都做到足,絕無行貨,但那些舊瓶新酒的情節實在有點夠了、膩了。
[PR]
by karvitz | 2010-07-23 21:28 | :: 日記仔女

:: 俟風。



電話的用途就是電話,接得通打得出就可以,如果要 add on,我只會揀播歌聽歌。

iPhone 當道,排隊等車見人玩,食飯搭檯又見人玩,睇睇下又覺得功能夠全面,又有大量無聊遊戲玩,真係幾唔錯。

講你知,我發夢試過執到部 iPhone,但未摸熟就醒咗,春秋大夢做唔成。

幾日前,我真係執到部 iPhone 喎!

:: 繼續音樂
[PR]
by karvitz | 2010-07-21 21:30 | :: 日記仔女



每況愈下?

相比當年推出《No Protection》,未有歌派台便趕著出碟,坊間的那種群情洶擁、萬人期待的情況已經不復再。宣傳不多,電視廣告欠奉,報章雜誌也很少提及,而《我沒有變過 愛的習慣》宣傳重任及賣點呢,原來落入咗由譚家明導演幫忙剪輯的音樂電影。咦!變咗買電影送大碟咩?

對側田有種特別的偏愛,是來自他那真實度高的聲音及音樂裡面的大多數是真的所致。如果大家對側田不敢興趣,《我沒有變過 愛的習慣》跟對上一張大碟《阿田》都應該會被納入為「悶」爆大碟。皆因情歌系的歌實在太多。

:: 繼續音樂
[PR]
by karvitz | 2010-07-18 22:59 | :: 有歌而發

:: 生活誌.二



※ 第一次抽新股是當年中國銀行 (3988) 上市,當年勞師動眾咁去咗朋友間銀行,搵佢幫手寫張支票 (因為我連支票簿都無),再順手投埋入收件箱就完成了人生第一次。

家下息口低,現金放在銀行的利息少到俾乞兒都未必想要,所以我寧願將非流動的現金用來抽新股 (股息高的),而且仲要有實物揸手的,因為派股息時就唔使被銀行徵服務費。

好似當年的中國銀行,抽中咗兩手共投資六千蚊,一年的股息就有四百幾蚊,雖然唔算好多,但都總好過放入 Saving!

近期內地最後有阿爺支撐的銀行 – 農業銀行終於上市,雖然業績比不上中工建行,但我信阿爺唔會眼白白由得你死,所以在散客冷淡對待之時,我就走去熱捧。如果派息比率可以貼近中工建,其實已經非常唔錯。

睇下今次又好唔好彩先!
[PR]
by karvitz | 2010-07-14 23:32 | :: 日記仔女

:: 生活誌.一



※ 話說世界盃初期,西班牙連分組賽都未踢之時,我早就下注咗西班牙及阿根廷會拎冠軍,十蚊咁多。之後呢,西班牙首場分組賽就輸俾防守密不透風的瑞士,當時心諗,真係賭錢落海。之後阿根廷提早出局,西班牙又不斷小勝咁碌入決賽,讓盤客輸到呱呱嘈,我就樂得安靜咁等結果,睇下有無派彩。

捱眼瞓到一百一十六分鐘,西班牙終於入球,奠定勝局,世界二哥初奪世界盃冠軍。而我今晚所得的派彩就有四十二個半,夠食個豐富早餐頂肚喇!
[PR]
by karvitz | 2010-07-13 23:05 | :: 日記仔女

後上有勁。



聲音沙啞到爛的程度,無論根底有幾好,音樂有幾出眾,始終都是差一點。

萬眾期待的陳奕迅《DUO》演唱會終於都推出了影音產品,CD 及 DVD 的封面都各有不同,任君選擇。我最愛的是 DVD 雙封面中,在製作舞台裝置的工場內夜深人靜的 Snap Shot,很有味道,而另一封面上的陳奕迅竟有點張國榮的味道,真神奇。

最重要的,都是唱。

:: 繼續音樂
[PR]
by karvitz | 2010-07-12 02:50 | :: 有歌而發

:: 執。

又執一間。



在路口旁的惠康在端午節靜悄悄地執咗笠,沒有清貨大減價,整個感覺好似漏夜執嘢走一樣。幾個星期後,附近有三十一年歷史的韓國餐廳都要忍著淚說再見。

韓國餐廳老闆是個真正的韓國人,一夫當關作收銀大將軍,很少聽他說賡東話,但其實佢應該識聽識講。記得有一次已經衝到餐廳門口,驚覺入口的擺設有所不同,到處都有白色鮮花,配以貼在牆上的生活照,感覺很奇怪,我們的想法可能是私人派對,二話不說就轉場去了。

後來我們才知道,原來韓國餐廳老闆的媽媽剛過身,兒子在她的心肝 (韓國餐廳) 作紀念儀式來悼念,這一下真夠感動。

韓國餐廳執笠後,我再發現附近的舊式即叫即炒快餐店及意式雪糕店都關門大吉了,有人情味的店子愈來愈少了。而家執下又一間,執下又一間,遲下呢個區就只容得下冷冰冰的銀行及勁銅臭味的地產鋪,諗起都覺得氣餒,唉。
[PR]
by karvitz | 2010-07-07 22:10 | :: 日記仔女

:: 中獎黨。

我又中獎喇!

不是戲飛,更不是南非世界盃五天四夜的決賽週的旅程。



對!又是網上的呃神騙鬼中獎電郵。呢款由報稱 Gmail 小組發出的得獎通知,這個星期已經是第三封,我連 Link 都懶得 Click 就即刻 Report Spam 喇!

想帶出早前新聞紙都有講過,而家部份騙子會透過社交網站識人,熟絡之後就使出騙人的技倆,例如中了大獎欠手續費又或是匯款出了問題等等,每次都騙幾百蚊,少少地易上當,之後積少慢慢就會成多。

又是那句,無付出過又點會中獎?不異之財,真係咁易到手就真係詭異!

騙案實例: http://www.hkcd.com.hk/content/2009-04/01/content_2282036.htm
[PR]
by karvitz | 2010-07-05 20:29 | :: 日記仔女

:: 梅菜扣肉



梅菜扣肉,人仔十八蚊。賣相非常不錯,扣肉薄薄的只有六、七片,但最精彩的都是那些索晒汁墊底的梅菜,堆得高高的又夠晒入味,撈飯夠食幾碗。

:: 繼續悅讀
[PR]
by karvitz | 2010-07-03 23:07 | :: 日記仔女