<   2011年 08月 ( 13 )   > この月の画像一覧
:: 若要人不知.切勿太低 B
對香港政府的管理團隊好失望。一個二個都只係識死撐,有風有浪的時候就龜縮,包括唔用自己架車怕招搖及從後門出入避示威者。如果不是自己理虧,怕什麼從正門出入?堂堂政府大官要走後門,貪其意頭夠好嗎?

反過來,你可能話他們夠團結,一方有難,八方支援,無論對跟錯,大家都槍頭都係一致向外(但就不包括疑似特首後選人)。今次警權是否過大是很好的討論議題,除此之外,政府對記者採訪的態度亦突然大為改變,由可以自行拍攝到只可使用政府新聞處的片段,嘩!簡直似大陸官媒的做法,香港的新聞自由度淪陷喇!

昨日又爆「有黑影攝出來唔小心架住部攝影機」,呢種解釋,就等如小朋友打爛隻水杯,之後來阿媽講,頭先有個黑影閃過,之後隻手就碰到隻杯,之後就爛咗!你估阿媽信唔信你?

我明白信任是好重要,但下屬跟你匯報,做上頭的都好應該隔隔渣先出街,而家即場俾人「偷笑」、「竊笑」,既難睇又無謂。

如繼續惡化,香港只會愈來愈亂,送飯送紙飛機送棺材的情況將會更多,我諗「官迫民反」呢四隻字,香港好快用得著。

祝高官好運。
[PR]
by karvitz | 2011-08-31 10:54 | :: 日記仔女
:: 2011 音樂結集.二十二

〈張氏情歌〉的沙啞,大家都擔心吹神是否仍未復完,幸好小克已解釋是刻意營造。他還說如果字正腔圓地唱,便太悶了。對!如果要找一首唱得粒粒音都工整、又是一首情歌再加上是靚聲,我會推介你聽返〈預感〉,不是說這首歌悶,但感情付出方面就像少了一點而矣。


幾段讀白中,最感動到我的是湯駿業那段「我返唔倒嚟喇 我哋遲啲...我哋遲啲喺天上面見喇 你要好好照顧自己呀 知唔知呀 I love you」我不期然便把思想投射到 311 日本地震的一刻,淚就自然滴出來了.... 這首歌絕對是年度十大之選。- 《末日》(前1'30")


真係好憎在〈兄弟幫〉、〈潛行追擊〉等節目見到 MC Jin,做主持及遊戲節目都過份用力地搶,太難睇鳥。撇除以上的馬騮戲,我真是喜歡他的 Rap,內容不是重批判性的,輕鬆笑談,閒時添感動時刻就是其標緻,新碟《回香靖》中,〈回香靖〉就是這類簡單,但有血有肉的作品。

:: 繼續音樂
[PR]
by karvitz | 2011-08-28 02:48 | :: 有歌而發
:: 解決問題。
我幾喜歡解決問題後得來的快感。

我上司主張「幫得到就幫」,很少向其他部門說不的,因此 jobs 就堆積如山。當上游再不能儲水,大壩便會洩洪,通常最濕碎、最無厘頭的工作就會派到我這邊。

別理我的職務範圍是什麼,我上司曾經問過我 Wise-Kids 在哪裡有分店、大陸豆丁網的豆點是點樣賺、又試過寫幾隻字貼響我枱頭,叫我搵一部空氣清新機在香港有無代理,層出不窮。

還好我是個愛解決問題的人。工作以外,最大的滿足感莫過於身處異地時,搭巴士坐地鐵望路牌讀地圖,從一頭霧水到撥開雲霧,順利地找到目的地,對我來說,這都是一種旅行帶來的意義。

解決問題的感覺係幾好,但點解日日都有咁多問題呢?

哎呀!我上司又來喇……
[PR]
by karvitz | 2011-08-23 22:25 | :: 日記仔女
瘋癲香港。
香港淪陷了。

不是說有龍捲風大颱風或地震等天災,而是有極嚴重的人禍。從來未有感受過香港的自由被縮窄得那麼厲害,一次副總理訪港,先有封路封橋阻示威,繼而連著件 tee 都要被人拉,最後還有香港大學校長助慶,一句「港大已唔再係香港的大學,香港大學已經係中國國土上一個國際大學」,真痴膠線!最新近的還有那位「吊吊fing」 的「Completely rubbish」。一個二個位高權重的都是這樣,難道一定要背靠大陸才能成功?

還有,副總理口口聲聲多謝記者的連日採訪,可惜他一句記者的提問都無回答過,多咩謝?我多__ 謝你就有!

多謝香港大學的學生、麗港城的街坊及泛民的議員在打壓下仍然發聲,如果連呢種聲音都被大力打壓,香港可望好快就有一單倫敦騷亂事件……

希望有生之年唔會見到……
[PR]
by karvitz | 2011-08-20 13:43 | :: 日記仔女
:: 我在德福看小克。
d0039085_09786.jpg
初時接觸小克的畫作,最愛的不是聾貓的 the phantom of the panda或者 the panda of the opera,反而是 《是他也是你和我》的系統,由〈葡萄成熟時〉的靈感開始從而觸發林海峰寫〈細路哥〉一曲,連鎖帶來的故事性很強,且故事非常生活化,看得實在戚戚然。

d0039085_01045100.jpg
如果要數小克在網絡上的大紅,應該是由〈十分菜〉及〈如果菜〉開始,之後聾貓玩食字翻 hit (其實早期畫聾貓闖迪迪尼做臥底都已經好笑),整個愛捧小克潮就吹起來,一直延綿到填詞界。

d0039085_0134693.jpg
捐錢就可以進場,捐十個大洋以上就有貼紙送,入場費用來做善事,多少都無咩所謂喇!展地不大,很多手稿,大部份都可在其漫畫本找到,除了商業類插畫外。

時賤時趣係小克的性格,除了手稿外,千萬別漏了其後加的抵死評語,識笑就盡情笑吧!

展期到八月尾,仲有時間,gogogo!
[PR]
by karvitz | 2011-08-18 23:06 | :: 日記仔女
:: 少女手電。
年半前,買了部可插雙咭的大陸手機予老媽,為的是可讓佢返大陸時可以方便聯絡。可惜,手機未用到年半便打柴,又要費神去為老媽搵手機,今次絕對不再掂大陸牌子貨。

初想不如買部平平地的智能手機,兩千蚊樓下有大把選擇,而且仲係大牌子,應該無咁易壞。但老媽就偏愛摺機,喜歡打開來聽那一刻的感覺,夠實在喎!遍尋鴨寮街,摺機的款式不同,日式系的摺機最靚,但無中文顯示,退而求其次就落到韓國貨,原來 LG 推出過一系列走少女青春路線的手機,即係介面用粉色及 Kawaii 公仔作招徠,都算幾襯老媽 (用少女系統來襯老媽,其實 OK)。

再望望價錢,同款同型號的在街頭與街尾可以相差兩百蚊,而且有部份機款的價格可以拍住智能手機,諗諗下又覺得不如買智能手機喇!既然價錢都差唔多。

係囉!老媽子要部智能手機做咩?打 angry bird?佢話不如用時間來煮飯;搭車時玩下十三隻麻雀,佢又話不如眠下好過,真係俾佢笑死。咁最後,當然係買部少女系列俾佢扮下後生喇!

P.S. 其實我老媽唔算好老,只係慣口叫佢老媽而矣。
[PR]
by karvitz | 2011-08-15 00:33 | :: 日記仔女
何謂服務?
很少用公營的醫療機構,就算中學輪街症的次數都只有寥寥數次,記憶中態度都算和藹的。近幾年因有醫療福利,大多數都是見私家醫生,服務還好吧。

近日再次投身公營醫療的懷抱,一早起身去輪籌,先有櫃台「倔」聲「倔」氣兼笑容欠奉,我體諒返早班是辛苦的,所以算數。到入診症室見醫生,估不到連醫生及助護都是粗聲粗氣,毫不友善,醫生的手勢極差,達到目的而不理會有否弄痛病人,說話的那種態度比低級洗頭仔仲要差,那個助護更三番四次地說 (無語氣的),「你耐心等,真係慢慢耐心等喇,排期要等好長時間」,聽完我真係冷笑左一聲。

我知道俾幾廿蚊就有醫療服務是一件何等超值的事,但醫生、助護及登記員都是受薪的,俾返小小應有的態度,可以嗎?

最後想講,我親眼見到一位婆婆行到照 X-Ray 的登記處問是否要把頭夾除下,接待的語帶粗暴答「頭先咪講左俾你聽要除囉!」咁你可能會覺得姐姐好多嘢做,所以狂燥指數爆燈,但 Sorry …… 佢對眼都係無離開過那部三十二吋、供病人睇的電視!

唉!點解公營醫療機構會變成咁?真係好可惜………
[PR]
by karvitz | 2011-08-14 23:02 | :: 日記仔女
:: 喂喂喂。
今日,連接兩個怪電話。

1.
人:「請問你溫先生係唔係度?」
我:「唔好意思,我地無溫先生,汪先生就有!」
人:「W-A-N,應該係姓溫的!」
我:「咁你打幾多號電話?」
人:「2-8-X-X-X-X X-X」
我:「呢個電話係第二個部門喎!點解你會打左來我呢個部門?o個個部門就真係有位溫生!」
人:「 唔知喎!」
我:「咁不如你留低公司名及電話,我叫溫生覆返你喇!」
人:「我姓蔡。」
我:「下?我問你公司名同埋電話,你俾個「姓」我係幫唔到你架喎!」
人:「er….. 咁唔好意思!」

收線。

:: 繼續悅讀
[PR]
by karvitz | 2011-08-07 23:21 | :: 日記仔女
:: 怡香。
其實,幾時由魚香變咗怡香㗎?

d0039085_133612.jpg

[PR]
by karvitz | 2011-08-06 23:58 | :: 日記仔女
:: 2011 音樂結集.二十一

〈晚晚禮拜六〉我評價好壞参半,但新派台的〈又燦爛又糜爛〉就眾人讚好。編曲夠晒八十年代的的士高風格,襯底音樂讓我想起電影裡用左夜總會小姐出場的一幕,真的是又燦爛又糜爛。說到曲子,把最精彩的編曲退好,底蘊很像〈斗零踭〉而唱法就很楊千嬅,姐妹作同樣做得好。


只看歌名,〈除下吊帶前〉是幾嚇人的。暫時放下 Fiona 唱這類少女保住最後防線的歌還是否合適,我想講的是黃偉文的玩字技術實在高,沒有過份的堆砌,但就有小小咸多多趣之意。最愛的是「解開我的問題前其餘未會脫下」前面的那個「解開」真的很好玩。


新聞紙說唱片公司無資源去讓他們再出發 (真相應該是不想再投資落咸水海),迫使他倆自資圓十週年 re-union 夢。〈Ready to go〉由張敬軒監制,不再是年青的口香糖流行曲,不只是組合的名字變成大楷,真的是連歌路長大了。祝重新出發成功!但副歌的處理手法很 〈Deadline〉 囉!)

:: 繼續音樂
[PR]
by karvitz | 2011-08-06 23:25 | :: 有歌而發