人気ブログランキング | 話題のタグを見る

:: 一零音樂.二.勁爆.叱咤。

勁爆

.抱著鼓勵歌手的目標出發,繼續大派豬肉獎,眾歌手繼續「你夠膽頒.我就夠膽拎」。

.新香蕉俱樂部及啤梨繼續有好成績,後者與工作態度差劣的范萱蔚合唱〈我們結婚了〉拎新城勁爆合唱歌曲,其代言的分期付款的酒家會否再加碼拍多輯廣告,好讓他們唱多首〈我們離婚了〉呢?

.Irene A 繼續有獎拎,恭喜晒!

.我真係好想知道《全銀河系我最喜愛男、女歌手》呢兩個獎,勁爆幾時夠膽頒!

.其他乏善可陳。

叱咤

.想先講!林夕呀!林夕!你唔好咁樣上台喇!離晒魂咁樣,難道又病發嗎?

.〈度水三千〉呢個GAG 唔好笑囉!

.如果唔係謝安琪咁多負面新聞,又如果唔係楊千嬅結婚沖喜成功,更如果唔係容祖兒持續人氣不足,我最喜愛的女歌手絕對唔會跌返入楊千嬅懷裡面。咁多如果,難怪〈如果我是陳奕迅〉可以跑出。

.男歌手金獎、至尊大碟、至尊歌曲及最喜愛男歌手都一手拎晒,加埋最喜愛歌曲五強獨佔三強。(我將〈如果我是陳奕迅〉計埋入佢數) ,陳奕迅咪就係等如大贏家囉。

.無線封殺唔緊要,呢個世界仲有好多渠道去聽 / 睇返實況現場。聽 – 可以攪返個 Hong Kong Tool Bar,睇 – 就可以上返 my903.com 睇花絮,見到陳奕迅走晒音唱〈Allergllo 3.3a.m.〉再扮仆低,細蘇夾農夫張繼聰方大同唱〈Mirror Man〉及林海峰夾朱凌凌唱〈每首歌都好好聽〉,終於感受到要擁有必先懂失去怎接受呢一感覺!

.林夕話自己鬆懈咗、雷頌德又話自已懶、連 Wyman 都話自己年尾先發力,攪咩零九年個個都咁懶散?但就係呢班人懶散, Rubber Band、Mr.、Dear Jane及Swing等等一手包辦的樂隊才有機會出頭!仲有,得益的還有佳作不多的徒弟林若寧。

.叱咤強呢隻怪獸雖然唔討好,但放到台上,叱咤強化身零九年的音樂字典,LED打出一個個對話匣子全都是歌曲的 Credits,呢個 Concept 我好 Buy好喜歡!

.呢點係後話:話說英皇老大哥吳雨坦然對叱咤的賽果失望,話容祖兒好努力開演唱會,廣告歌〈這就是愛嗎〉及〈雙冠軍〉又Hit,無理由只得一個獎。抽個身出來睇,今年容祖兒在香港區的成績只屬普通,〈這就是愛嗎〉主攻大中華區,香港反應一般;而〈雙冠軍〉更只屬流行K 歌一首,不算得什麼大熱作。還值得一提的是,付出十倍努力不等如有十倍回報,吳雨先生呢番努力論,我怕只是適用於勁爆及勁歌頒獎典禮!

.at 17 的請食飯論幾感動,加上把Wyman 的一番話拎返出來講,霎時間就把〈窮得只有愛〉對號入座。可惜今年 at 17 都仲未有第一首叱咤十大。



:: 音樂分享

愛情總是不守時的,過去了的愛,想回頭也不能 ......

雨過天陰〉- 謝安琪 (出自 《Slowless》大碟 )
- 當天的臉今天出現 似熟練但不安的友善


守時〉- 王菲 (出自《自便》EP)
- 一次 無須有下次 讓我安心聽你 重溫往時

by karvitz | 2010-01-11 00:34 | :: 有歌而發