:: 老頂個老頂

講完老頂，今次講我老頂個老頂。

我除了直屬老頂外，更加直屬我老頂個老頂，咁我稱呼佢為大老頂。

大老頂睇幾個部門，一腳踢晒十九幾萬樣工作，咁做唔晒就自然要分落來俾班細既幫手，但如果件事非常重要及牽涉到更高層，大老頂通常都自食其力，自己揹返。

有個部門阿頭搵大老頂幫手，實際上只係一單雞毛蒜皮事，但佢唔想得失別個部門的阿頭，咁佢自己哽埋來做，但背後既資料搜集就跣咗落我到，咁幫幫手當然無問題，受人錢財，替人消災的道理我係完全明白的。



好喇！我做好晒應做的工作，兼把所有資料都 pass 晒俾大老頂，佢睇完之後答咗句「好！無問題，之後等我自己整喇！」

過兩日，大老頂揸住兩份文件問返上我次俾佢疊資料裡面既 information，我心諗「資料已經俾晒你，你又話無問題自己整，霎時間又要我摷返出來，難度超高喎。」後來我叫佢放低兩份文件，再晏少少先 attach 返資料俾佢。

哎呀！點解會咁，但實情就係咁，而且好多次都係咁，已見怪不怪。而家唯有每次做好 proposal 之後都留一份 back up，在 back up 文件的同時，我亦在 back up 緊自己份工，因為我有個超多嘢做既大老頂。