:: 會哭的橡皮糖。

早幾日與同事去買零食，我望了又望他們揀的幾包橡皮糖，突然有種回憶湧出來，想著想著才發覺我的童年活得不算太快樂。

小時候老媽老爸都要搵食且早出晚歸，所以我三、四歲的時候就寄住在婆婆家，直到初中。不能說婆婆的照顧不好，但男孩子應有的特質，例如爛玩、污糟邋遢、通街走．．．我都有齊，所以婆婆的嘮叨就特別多。那個時候，一個月才有機會見老媽一次，特別珍惜。記得大約在小四、五的時候，我已學懂自己一個人坐巴士轉地鐵去老媽當時住的小房間 (應該是劏房的前身吧) 。



其實去到老媽間屋無什麼好玩，但感覺就像在陰霾的環境下呼吸到新鮮空氣，自由自在。當時老媽會買我小禮物及糖果，又會帶我去外出食飯，我生平中的第一次韓國燒烤就是老媽牽引的，那地點、環境、味道及那碗白飯的滋味，我至今都記得。

一個週末過去，我又要返婆婆家，老媽通常都會買些小糖果給我。好記得有一次，老媽送我搭車，我坐下層一直望住她，我的眼淚就不停地流出來，老媽不停咁講「傻仔，好快就見喇！唔好喊喇！」佢愈咁講，我就喊得愈勁，直到巴士開車……..

那一次，媽媽送我的是日本的果汁 100% 雜果味橡皮糖，我坐巴士上邊喊邊食，用眼淚配橡皮糖，百般滋味呢。

我，就是在這種環境下長大的。