人気ブログランキング | 話題のタグを見る

// 四月十七日 -- 放假啦!

有一段時間都冇寫過自己的生活紀錄,今日終於都完成了已計劃好的假期活動,有時間可以記下有發生過的事了。

1. 又要想當年,記得小學時代放學回家,太婆便會將冷飯弄暖,之後只放一隻雞蛋及小小醬油便當一個「Late Tea Time」。味道是什麼?我大概都已經記不得,但我卻記得當時我好肚餓,咩野狗屎垃圾都會覺得好食。時代變了,我已經有好一段時間沒有這樣吃,但我仍然是帶著那種「地道」及「市井」。前幾日,媽媽準備的晚飯異常地差勁,但她識趣地著了幾隻咸蛋。我霎時拿走了一隻及切開了兩半,便足足夠我送一大碗飯。屋企養我,有時真係可以好鬼慳。



仲有仲有,不只是咸蛋可以滿足我,一磚小小的腐乳也可以夠我送一大碗飯。唉!真係唔係上等人就唔係上等人,食D 野都Cheap D 啦.... 哈哈!

2. 上星期四,有另一位高層男同事離我們公司而去,我們上上下下都大概知道是因為工作太辛苦的關係,無理由一個有家庭有負擔的爸爸會突然間離開自己的崗位的。當日,他沒說一句便靜靜地離開了,留下了一張小小的字條予我們的上司。

字條上只有兩個字 「多謝」...... 這兩個字看似簡單,但一切盡在不言中。



3. 四月十四日,是第一日紅假的開始。我們一大班朋友已經急不及待地約好一起娛樂一番,娛樂就是玩玩「衛生麻雀」。今日好奇怪,大家都「做牌」的能力非常高,八番成日都有,自摸打出成日都出現。我記得最經典的都是我那鋪「混一色 + 2隻靚花 + 槓上自摸 + 有番番子」就等如八番,全場嘩然!哈哈!

打完麻後便行行街,買買碟。我瘋狂地買了陳奕迅的EP 第二版,真係好瘋狂。希望可以換到隻CD 裡面話送的那件T-shirt 啦!

今晚食飯假座於灣仔意粉屋,見外國人多過見香港人,哈哈!我們極豪氣地點了天使麵、意粉、飯、闊麵、洋蔥圈、雞翼、兩個沙律及一個大的三文魚Pizza。理所當然最後大家是捧著肚子離開,極飽。

4. 十五日的星期六,約了朋友打羽毛球,原本是三小時的漫長旅程的一天,不知是否我記衰退,還是約錯了時間,我竟然遲到了。左左右右後,最後用盡力地玩了兩個小時。看似辛苦,但其實十分Enjoy。

之後走到維園旁的「巴西燒烤」開飯,眾人也大吃大喝一番,但又有不少人話要減肥減肥,攪到我好似多佢地好多野,嘻嘻哈哈又過了兩個小時。飲飽食醉後,由天后行路返銅鑼灣,一班人有講有笑,大笑傻笑喪笑。大家散後,又剩下我自己一個回家,靜了下來,自己不停地想,究竟那個才是真正的我,是嘻嘻哈哈?還是沉默靜下才是真我?真係連我自己都唔知........

5. 可能是昨日的羽毛球運動不夠,今日繼續約了洪生出來打羽毛球,單對單,兩個小時。雖然不是太過辛苦,但下次都係搵四個人打兩個鐘,或者兩個人打一個鐘好似化算小小啦。

打完波返屋企,一口氣地看了幾件星期六需要睇的電節目。《第一季優秀選》及《電車男》,其實亦有《捉鬼天狗幫》及《廚神》在星期六在電視上影的好節目。

《第一季優秀選》真的值得一讚,讚的是來自AT 17 及 崔健邦的一邊唱一邊數的頒獎儀式,AT 17 真的唱得不錯,但真真正正感覺到她們開始行商業了。

《電車男》來自日本高收視電視劇集,雖然是有點誇張,但原來有些地方也是挺感動。



《捉鬼天狗幫》是在繼《魔剎》後的另一套卡通片選在深夜播出,神神鬼鬼的劇情,雖然不見得特別,但因為是單元式的故事,不用連續追開,總算不錯。



《廚神》真係唔知有幾多人知道呢套在明珠台播放的電視劇集,男主角主演過第一輯的《特務A》,所以有點點印象。此劇不算大卡士,但勝在好笑,勝在輕鬆,每個星期也可以逗得我哈哈大笑。仲要,每集的最後都會用一些人生哲理作結尾,劇集看似騎呢,但睇落也算不錯。



其實星期六仲有一個節目好好睇,但唔係成日都做。我真係唔明佢係香港點解會紅唔起,佢好鬼攪笑,又好鬼得意,可能佢實在太過大美國主義啦..... 佢就係.....




呢隻傻頭傻腦心地善良但笑料百出的小海棉SpongeBob 啦..... 真係好好笑的!
by karvitz | 2006-04-16 19:51 | :: 日記仔女