// 四月二十六日 - 陳浩德金曲情牽三十載演唱會

今日八時半，Solar 正在紅館舉行他們的第一個唱，我雖然沒有出席，但我卻在一海之隔的中環大會堂欣賞陳浩德 (德哥) 的金曲情牽三十載演唱會。

　　　　　　　　　　　　　

其實今晚並沒有想過入場欣賞，但臨時地朋友說有票，而媽媽又已經買了票，就這樣不如當作親子活動。(但我與媽媽是相隔幾十個位)



演唱會入場了，感覺有點熟悉，在哪裡看過呢？........ 哦！原來那個感覺似在紅館入場一樣，人生人海，真的非常熱鬧。



由入場前到坐定定，我也嚷著我可能會睡著及早走，如果睡著....還會睡得很甜。:P

開場前，八時十五分，有忠實樂迷問帶位姐姐: 「有冇攪錯，係唔係你地做野慢，攪到遲遲都未開場。」帶位姐姐解釋是因為製作單位的問題，不是他們可以控制，之後樂迷便坐下。後來，我發覺她原來真是德哥的忠實樂迷，因為一開場就已經送花 (可能怕送唔切) 。

終於都開場，載歌載舞一番，歌舞昇平，聽得一班樂迷拍爛手掌，但我卻差點兒笑出聲來。


替德哥伴舞的是幾位靚女 (嬸) ，黑色打底衫 + 銀色閃背心 + 草綠色短裙 + 黑色絲襪，跳跳跳。(仲有一套係黑色打底衫 + 紅色肚兜 + 金色短裙 + 黑色絲襪，勁驚嚇！) 顯然地覺得她們不是太合拍，但我卻見到她們跳得非常開心。唔跟拍子，唔跟舞步，最緊要跳得開心，可能就是她們最滿意的演出。

可惜，我見到她們一身的打扮，真係唔好意思都要笑一下。

之後，請到兩位德哥口中稱拎世界冠軍第一對年青男女跳拉丁舞。這一下，真的是專業，雖然他們與歌者唱的歌明顯唔夾，但仍然努力地跳，好睇好睇。(但實情就係那兩位小朋友一位只是校際冠軍而另一位則是得到十六歲以下國際賽的季軍)

過後的德哥獨唱，我開始有點兒想睡，但到了德哥揀選了梅姐的前作《抱緊眼前人》時，我又醒了。一「醒」是因為德哥真係太Man，唱唔到這類柔柔的歌，二「醒」係因為那兩個和音又真的唱得不錯。因為我坐近舞台，也可以看到他們在唱，不錯不錯。

之後的嘉賓有金興賢與德哥玩「斷背」，方伊琪的奪命少女裙及舒雅頌的強勁叫座力也令我醒神起來的。

中場有夏蕙姨的出現..... 勁爆及方伊琪中段無帶腦上台的對答真係令人覺得「你冇野呀嗎」。

最後，我在德哥的歌聲中離開大會堂，因為那首「金唱片」歌曲實在太悶。離開大會堂前，我聽到門口的保安說 : 「一陣一定好多人拎簽名。」有人答: 「你又知？」保安再說: 「你睇下幾多人聽就知啦！」

講真，真的不可忽視一班在這個年代才有機會看偶像聽歌曲的一班老朋友。

而我，卻也正在做相同的一件事！我終於都有機會入場看周慧敏姐姐的演唱會，因為小時候想看而沒有錢，沒有機會，沒有人帶而錯過了。今日我終於都長大了，這演唱會也可能是她的最後一個個唱，點可能唔去捧場。就正如那班老朋友去看德哥演唱會一樣，以前沒有機會，今天總算有個機會，終於可以完成心願。

下個月二十五日，周慧敏姐姐...... 我來了。