人気ブログランキング | 話題のタグを見る

// 十月六日 - 亞洲電影節 2007 - II

            
女鬼的教室
- 韓版阿久津老師上身,黑色套裝板起口面,驟眼看還以為係老翻《女王的教室》。好彩,老翻阿久津老師扮得個殼,唔係主角,亦只係拎個冷冰冰的感覺出來。電影的主體是一班女學生,為入讀大學而奮力向上,從而在鬼校舍撞鬼,你嚇我我嚇你,最後學校一把火被燒晒,無據可尋。

表面是一套鬼片,但實質是諷刺韓國的教育制度腐敗,為了讀好書,不惜犧牲子女的青春日讀夜讀,而且放成績在最著眼點,與「求學不是求分數」背道而馳。最記得電影用成績高低來編排座位的那幕,雖然殘忍但實際社會的確如此。

P.S. 戲院全場應該只有十多人,但出奇事極多。有人傻下傻下無睇清楚買飛入場,卻驚叫只有英文字幕無中交字幕,又有人驚叫話好驚,最離奇的都係有人在差不多完場時出聲警告前者「驚 … 就返屋企睇VCD 啦!」好絕,好好笑,但點解唔早小小出聲呢?我點解唔出聲?係因為我真係聽唔到有人驚叫話好驚喎。

              
《失落的行李箱》
- 好一齣印尼地道風情話,在最草根的地方拍攝,到處混亂,到處也是荒唐事。可惜電影悶戲連連,開場不到十五分鐘,我已有昏昏欲睡的感覺。幸好,當男主角執到名貴物李箱後,有過一兩次笑位,都算有提神之用。

電影超級悶場是認真說的,但這卻令我看到實實在在印尼境況。報警要俾錢、做好人要俾錢、黑社會幫手講兩句說話要俾錢、小朋友幫忙要俾錢,向銀行借貸又要俾錢,總之咩野都以錢行先,好驚!再且,原來印尼人係唔識路不拾遺,執到野都必定據為己有,報警退還只會俾人覺得係傻仔行為。

當然,我都唔係君子,但如果我真係急到無路走,而又知道面前個行李箱可以幫到我,點都好,借又好拎又好,一定會用左先啦!食古不化唔代表忠誠,走精面亦唔等如古惑,問過良心過到自己度閘,走歪小小其實也情有可源。

P.S. 要我將呢套電影分類,係劇惰、輕鬆、奇情還是驚嚇?我唔識分,因為樣樣都有,但每樣的處理手法都係一般,如果硬要分類,我認為風景及民生類記錄片比較匹配呢類印尼電影囉。
by karvitz | 2007-10-07 01:20 | :: 日記仔女