:: 三月炒雜碎 - (二)

近日心情好起伏，生活太多雜碎，無直接影響生活，但卻曲線的影響情緒。

雜碎二

上星期，走左去 Yahoo 拍賣場搵下平靚正CD ，諗住睇下有無荀貨。點知，我搵到一隻全新的，又相宜的心水唱片，當然立即落Bid 啦！過兩日，好好彩俾我 Bid 到 (係要用好好彩) ，之後與賣家溝通，佢話全新的無咁平，二手九成新的都有一隻，問我要唔要。我覺得問題不大，一口答應而且翌日立即過數。

點知過數後，賣家再提出話個碟盒爛左，只係得CD 而無盒。我登時「下」左一聲，由全新變二手到爛盒，最後只得兩隻碟？？有無離譜左小小呀。之後當然同賣家理論，而且把呢個個案投訴予Yahoo 拍賣場作備案。

最後賣家決定退錢，我當然無異議，同時間賣家亦解釋唱片從可而來及不是存心欺騙，我完全接受她的說法，但她卻遲了兩日先講，如果一早講明「無盒、只得CD」就唔使攪到大頭佛！

呢件事，我一點勞氣都無，正如賣家所講「要呃都唔呃幾十蚊」，我係明白的。在呢個情況，我都覺得錢唔緊要，幾十蚊豪俾你又點話，但我卻執著於「誠信」呢兩個字。

一個人有幾信得過，交談過共事過大概可以知道，但網上世界千奇百怪，有邊個可以話網上的「自己」係百分之百真實？

攪左幾日，最後呢次交易都係泡湯，我當然有丁點唔開心，但我見到呢位賣家盡力堅守那最後的誠信 – 就係如期退錢俾我，我都已經覺得有丁點安慰。

唉！講真呀，網上的誠信，又有幾可信呀？

搵 - 鬼 - 知。