人気ブログランキング | 話題のタグを見る

:: 又黃石一日

星期日晨咁早,搭巴士再轉小巴,由香港南熬到西貢,再轉越野巴士 (九曲十三彎的路都面不改容照踩油去) 入黃石碼頭,目的一次的天倫燒烤樂。

去到黃石碼頭,燒烤爐吉盤多,唔使爭唔使搶,更加唔使等就搵到大樹好遮蔭的燒烤爐。同行的無人抽煙,無買打火機都應算是一件合理的事,大家諗住去僅有的雜貨店買。點知,小店已於零七年十二月一日光榮結業,無人頂手之下關門大吉。好彩都問到僅餘的「爐友」借火,如果唔係都幾「茶煲」。

黃石碼頭都算係好地方,沒有銀線灣的嘈雜,又無黃竹灣的廢氣,海風輕吹,其實都幾舒服 (係程巴士難捱小小)。朋友個仔不斷撩玩 NDS 加踢波,踢波完又加NDS,循環地loop 住無時停,玩到氣都咳,但天倫之樂理應就係咁。如果媽有媽燒,仔有仔玩,爸有爸賭,咁做咩要去黃石碼頭,屋企樓下茶餐廳都可以啦。

          
  ▲ 就係呢位哥仔,玩完NDS 又玩波,之後再玩返NDS又踢波,真係辛苦晒。

          
  ▲ 郭太推介鹽燒魚,賣相好,燒也不錯,但不太嗜多骨魚的我,就少吃少吃。

          
  ▲ 我搵郭太揸機,佢拎上手就影張大師級作,見身唔見樣,真係唔該晒!:P

由十一點幾開始,燒到六點幾,差唔多天都黑晒才停手,各位身上都有陣 BBQ 味,與雞翼豬扒無異。最後一程都係搭返越野巴士(夜行線)返西貢,飽肚的感覺加上巴士上的空氣唔流通,再加埋兜左幾十個靚彎,真係嘔晒白泡加反白眼,好彩大家都撐得住,嘔吐袋可以留返下次用。

八點半散水,與朋友一家搭免費穿梭巴士返將軍澳。「亡命免費專車」是我替是晚呢架車的專稱,逢車過車,又與鄰車拍住鬥足一條大直路,真係絕不欺場。真係「嘩」一聲就返到將軍澳,二十分鐘,真係二十分鐘就返到,真係快到暈暈暈。
by karvitz | 2008-03-21 12:40 | :: 日記仔女