:: 幾齣戲

　　　　　　　　
　　　　　　　　　　　　　　　　《鐵甲奇俠》

從來都唔係美國漫畫的擁護者，神奇女俠蝙蝠俠蜘蛛俠從來都唔喜好，但真人版的電影都Keep 住有睇，但唔會太熱衷。

X-Men 都還好，起碼我在機鋪見過玩過，但鐵甲奇俠我就真係完全唔識，什麼來歷，來自什麼地方，一概不曉。

入場睇，大抵都係因為一個「信」字。

無期望，自然無失望。

套戲異常無敵超現實，現代的軍火商被擄，用一人之力砌成鐵人 28 樣子的盔甲，以一擊百 (今年係二千零八年喎，唔係AOE年代喎)。係！你可以話佢有夥能量之心，但始終都覺得怪怪地，套入八十年代都好似仲講得通，但說成發生而家呢個年代，就真係怪怪囉！

故事簡單，直接講，奸人良心發現後變好人，繼而想拯救世界做大英雄，講完。

好唔好睇？因人而異，有朋友睇到瞓著，有朋人則睇到拍手叫好，我就覺得「一看無妨」，唔會推介亦唔會再睇。

　　　　　　　　
　　　　　　　　　　　　　　　《一夜賭城戀大咗》

無辦法，世界上最難留的應該係青春。

由《情迷索瑪莉》呢套愛情經典開始，索瑪莉一炮而紅，當年真係好鬼索。可惜歲月催人老，由《神探俏嬌娃 II》已開始露疲態、《緣份精華遊》更加諳淡無光，感覺就好似索瑪莉老左廿年，又黑又乾，唔好睇亦都唔再索。

入場前，當然無期望索瑪莉會回復當年勇。

《一夜賭城戀大咗》呢個戲名通俗到爆，但同樣就實牙實齒話你知，呢套戲係屬於衰衰格格，唔扮高尚的一種。

實際在賭城的場景不多，一男一女由狂歡賣醉結婚ONS 共進早餐及贏三百萬獎金都不過係十五二十分鐘的事。

打後的時間是打回原型返歸屋企，兩人被迫結婚共同生活，務必要令法官相信兩人是夫婦關係，才有機會拎返部份中獎獎金。

男人污槽懶理、粗枝大葉
女人整潔愛美、挑剔難頂

兩個人溝埋一齊真係好多笑料，加上主角以上的朋友加鹽加醋，去得盡時玩得放，真係好睇喎！

推介與一眾有男朋友女朋友在身旁的朋友十指緊扣的一齊睇，應該會睇得幾暢快。

　　　　　　　　
　　　　　　　　　　　　　　　《色慾O先生》

嫌我睇《一夜賭城搞大咗》太低俗？我轉個頭又走去睇左套康城的參展電影 - 《色慾O先生》

失望，七十六分鐘拍到好似一百七十六分鐘咁，又慢又唔知想講咩野。

睇完套戲的第一個感覺係法國的男男女女都好咸濕，係唔係都上，識唔識都造，好淫亂好奇怪。成套戲除左造造造之外，最得我心的都係那一幕在天黑黑的凱旋門前踩單車，個感覺好奇怪，但又好鬼合我心。

總結: 差 – 一個字講完成套戲 (好彩朋友有買一送一，二十蚊入場都勉強可接受)