:: 黑雨記

天氣惡劣要返工已成習慣，從來都唔會埋怨，因為呢份係我的工作。

但遇正最強黑雨的時候要返工，呢次都係第一次，而且今日仲要係星期六。

唔講你可能都知，香港南區未有鐵路系統，出入灣仔銅鑼灣紅磡旺角的巴士小巴都要經香港仔隧道，一旦呢個「姑窿」塞咗，成個南區都可能半癱瘓。

今早黑雨，返工前後都雨勢強勁。平時搭開返工的小巴停駛(司機話四圍都水浸，開到車都未必出到去)。我有點唔信司機講嘢，飛身落去巴士站，剛巧遇到有隧道巴去旺角，諗住銅鑼灣落車再轉車都應該可以啦。

　　　　　　

點知.......


以為好彩出到黃竹坑，都應該順暢。點知去到中國銀行前的十字路口，整個路口被水浸，而且仲有車死埋火，巴士一架接一架咁塞住，情況險峻。好彩最尾都解決到死火車的問題，但咁樣塞一塞，就用咗半個鐘頭時間，都唔知係好彩定唔好彩。

　　　　　　　　　　　:: 等咗半個鐘頭，終於都再開車::
　　　　　　

　　　　　　　　　　　　:: 消防員警察一齊集結消防局::
　　　　　　

香港仔隧道暢通無阻，以為有轉機，但一個轉身睇到往「灣仔方向道路因水浸封閉」，心知又賴野。

巴士一出隧道口就直飛紅隧，中段天橋望到下面，先係舊新華社（麗都酒店）對出泥水處處，再之後「灣仔金龍噴水池」的路口完全被浸，有的士更差不多被沒頂，異常嚇人。

　　　　　　　　:: 沙泥湧至、水淹的士、車撞土牆，好混亂。::
　　　　　　

最後巴士沒有在銅鑼灣埋站，一車直出紅磡，我笑住咀出到紅磡，唔通今日玩行大運？

我唔夠膽再搭隧道巴返銅鑼灣，寧願搭到油麻地轉地鐵最保障。

終於返到銅鑼灣，我鬆一口氣，但最後我發覺最靠得住的都係自己的一雙腳。自己行，起碼有時間預到。但又吹漲，我遇到有電車經過 (聽說剛剛恢復行駛)，一個箭步立即上車及順利返到公司。

黑一黑雨，攪到我香港九龍兩邊走，雖然左騰右騰係有點累，但呢種經歷唔常有，在暴雨中享受一下都可以接受。哈！