:: Karvitz's Music Picks - Week 23 & 唱片故事 (2)

:: 續 上 期

幾天前，行過二手店。

在爭扎買唔買梁詠琪《給自己的情歌》之際，我突然看到那幾個擺放超低價唱片的紙盒內 (許志安呀、黎明呀、郭富城呢類)，有一張用透明膠盒包住的唱片，黃黃紫紫的不起眼，唔留心去睇，係無機會睇到隻碟上面寫什麼。我講到咁明，這張唱片就是《叱吒903 無樂不作　無處不在》的合輯大碟，我二話不說地笑住咁拎呢隻碟去俾錢。

我唔當我自己執到寶，但我卻覺得自己搵返點點的中學回憶，記得當年聽過咩野，做過咩野，見過咩野，玩過咩野……

返屋企當然二話不說開出來聽，當年好唔喜歡的〈豁達人潮〉，而家聽竟然愛上了，當年關淑儀把聲仲好清，首歌好舒服，一聽就愛上。反而出自〈一點便利梁康妮〉的Slogan就聽極都聽唔返當年的情懷，但幸好對首歌的感覺依舊無變，而家聽仲多了一份懷念感，唔錯。

說到唱片的故事還有很多，例如哈仔借我的許志安聽完大家異口同聲說喜歡〈天堂〉呢首歌，又例如老死喜歡聽王菲，夾硬買隻〈菲靡靡之音〉(95年) 送俾我，之後要我借返俾佢地聽。有好多好多故事，有好多好多回憶，唔知愛唱片愛聽歌的你們又有那些回憶呢？

隨著時代的轉變，買唱片的人愈少，借出的就更少 (因為單撈仲方便)。我相信以上一幕幕的唱片回憶在這個時代 (十八廿二的新一代) 將會出現斷層，甚至絕種。再唔會有人送唱片予朋友作生日禮物，上朋友屋企亦都唔會吼唱片架上的唱片 (甚自可能已經無唱片架)。

我慶幸有過幾段難忘的借碟經歷，就如老死迫我聽陳奕迅，佢唔係由MSN send mp3 俾我，而係夾硬塞隻碟入我個袋威迫我去聽 (唔只一次)。呢種對唱片情懷真係好難得，而家真係好難再搵得到。

－－－－－－－－－－－－－－－－－－－－－－－－－－－－－－－－－－
　　　　　　　　　　　　.:: Kar’ s Hot Picks ::.

1.　Beat it – Fall out boy　*MV
2.　Thriller – Michael Jackson　
3.　Billie Jeans – Michael Jackson　*MV
4.　豁達人潮 – 關淑怡
5.　車匙 – 陳柏宇　*MV
6.　傾城 – 許美靜　*MV
7.　善忘 – 藍奕邦　*Live
8.　留座 – 陳慧琳　*原裝日本版 - 小柳由紀 - Be alive
9.　人來人往 – 陳奕迅　*MV
10.　明知故犯 –許美靜　*MV

:: 原裝版的〈Beat it〉應該家傳户曉(年紀少的可能唔識)，就算我小時候絕少接觸外語歌，我都對呢首歌有一定印象。米高由黑人變白人，正常到孌童，好多負面新聞及話題，但撇開這些難攤子，米高的快歌勁舞作品真係一絕。

但咪以為呢首好歌落入他人手上翻唱會變爛作，觀其Fall out boy 今次翻唱〈Beat it〉，真係好出色，老馬有火。從主音聽得出力量，結他及鼓聲異常有勁，朝早俾呢首歌嘈一嘈，必定醒晒，無走雞。但如果你唔喜歡Rock 呢，呢首歌你應該可以唔使聽，因為真係嘈到爆。

同樣地，我希望香港都有歌手玩下呢招。將舊跳樓作加入Rock ，勁力地炸爆機，應該會幾好玩，幾大迴響。我心水選擇係周國賢配郭富城的〈鐵幕誘惑〉，中段副歌幾句好搶，搖一搖滾的話，應該幾爆幾正。

:: 〈豁達公雞〉出自《叱吒903 無樂不作　無處不在》大碟，照時間計都應該有十幾年歷史。但如果講歌曲的方向及唱法，就一點都唔覺係十幾年前的作品。有人話梁兆輝段Rap 好突兀，但我覺得都可以接受。成首歌的靈魂存活在關淑怡帶點飄的聲線中，而Rap 只屬配襯帶出走到最前，放開眼界的一點。如果用流行派台曲計，呢首歌算合格有突，但如果只計節目宣傳歌呢？呢首一定算高質素的其中一首。

:: 〈傾城〉及〈明知故犯〉把許美靜帶到香港，兩個偉文成功打造做輝煌的許美靜時代。〈明知故犯〉曲子實在太好，而許美靜獨門的憂怨聲實在配合，當年張燊悅翻唱簡直等如自殺一樣恐怖。〈傾城〉比〈明知故犯〉內斂，屬慢熱的一種，可幸當年宣傳攻勢日播夜播，雖曲子比不上〈明知故犯〉，但同樣大收旺場。如果再要數我的許美靜最愛，頭三位必定是初出的〈遺憾〉，下跌期的〈蔓延〉及高峰期的〈明知故犯〉。