// 「死穴」兩個

每人也有不同的「死穴」，例如你說女生肥，又或者笑曾志偉矮。今日，我被人用一陽指狠狠地篤中我的「死穴」

今日我到會計部賒帳買工具，會計姐姐叫我在借單上寫上我的名字作實。我把借紙寫好後交回會計姐姐，她望過了借紙便開口對我說：「究竟你在寫咩野，根本睇唔明，你D字真係核突。」那時那刻，我不知何解地勞氣著對她說：「我D 字核突，唔係呀嗎…..」但會計姐姐仍猛力地說我的字核突。

我拿走了我應得的東西後，便「氣沖沖」地離開會計部。走到升降門口，碰巧遇到清潔組的同事。他一開口便說：「你近排食左咩野呀？」他無頭無尾地拋下這句，我反問他：「咩野事」，他才緩緩道出：「你瘦左好多，係食咩野來呀？」我的氣沖沖霎時全消，換來的時輕鬆開心飄然的感覺。我匆匆地回答他：「是因為飲食均衡了及多做了運動。」便面帶笑容地離開。

原來，我其中一個「死穴」是說我字體潦草、核突兼睇唔到，而另一個「死穴」就是被人讚瘦身成功。兩個「死穴」，一個好一個唔好，但也一樣能令我留下深刻印象。