人気ブログランキング | 話題のタグを見る

:: Karvitz's Music Picks - Week 24 & 唱片故事 (3)

本來兩篇完,點知心血來潮想寫多一篇。

講開買碟,中學時期真係好捨得去買碟聽。而且每個朋友唔多唔少都有「買碟聽歌」的習慣,麗麗同學當年狂迷金城武,《可依靠的好朋友》一出即買 (而家呢隻碟值錢),我就無咩興趣,只知道〈只要你和我〉幾好聽。而四眼妹就鍾情林志穎,《今年夏天》係佢指定飲歌,真係「年輕的心像首歌」,但講真喎,呢隻《今年夏天》都真係算唔錯。

講到長情,梁小姐中一已開始迷張學友,屋企有存大量學友唱片。記得有年在水上樂園,黑媽媽的環境襯著喇叭播爆的張學友〈追鐘〉,開心到梁小姐傻咗。除了肥仔邦以外,影響我聽歌模式最深的,當然就係硬塞陳奕迅俾我聽的涼茶偉。涼茶偉的飲歌係〈九十幾萬朵玫瑰〉(應該係九百九十九朵玫瑰),邰正宵係佢第二最愛,但我真係唔係好得,太土氣加上太深情,頂唔順。

我記得送過陳奕迅的《我的快樂時代》俾涼茶偉做生日禮物,當然我自己都有買。點解會買俾佢做生日禮物?一來出碟時間與生日日期差不多,二來初版有四首《我的快樂個唱》的Live Version。那年坐在我隔離一齊睇陳奕迅的《我的快樂時代音樂會》那位,就係佢。為咗紀念又好,分享共同回憶都好,總之就送買多咗隻送俾佢。(早知再買多隻用來炒啦!)

好歌爛歌東歌西歌,基本上係廣東歌都會揩下聽下,當年走上朋友屋企,最最最喜歡就係摷碟聽。

打比周係Beyond Fans,十五年前家駒的離去,佢已經喊到傻咗。當年問佢借Beyond ,聽到家強唱〈祝你愉快〉真係聽到喊。而在《最精采的Beyond 演唱會》,細榮 Solo 一段的〈金屬狂人〉簡直入晒腦,非常喜歡。而棠妹就係陳曉東的超級粉絲,由〈一次真愛追尋一百次〉開始已經愛上,碟當然齊晒,借亦都無問題,聽下聽下,都會發覺幾多side track 都幾好聽,〈浪向東〉及〈講一次〉兩首為不錯選擇。

當然仲有啦,老死愛王馨平如命,當年王馨平的唱片只可遠觀而不可近摸,神聖不可侵犯喎!咁講真,〈別問我是誰〉的王韾平又真係幾唔錯。不得不講,王馨平只是老死的第二最愛,第一最愛卻是徐若瑄,好彩當年對後者一般,Black Biscuit 都興趣不多,我先無點樣掂徐小姐,如果唔係,打架反面都似。

回望過去十幾年,跟好多唱片有發生過,拎上手都有一段故事可以回味一番。但過後的十年,唱片慢慢被淘汰未落,到時我可能只可以望住一首又一首 MP3 來回憶曾經何時朋友送俾我聽。就正如我喜歡曬相一樣,我始終喜歡放在手裡的那種質感,憑空在電腦前懷緬總覺得不及抱在懷裡有意思。

喜歡唱片的朋友,請繼續買碟,請讓這張小小的圓形鐳射狀的東西繼續流傳下去。

----------------------------------
            .:: Kar’ s Hot Picks ::.

1. 渴求 – 黃伊汶
2. 山下的人 – 譚詠麟
3. Labels or Love – Fergie
4. Auld Lang Sang – Mairi Campbell And Dave Francis
5. 跑步機上 – 容祖兒
6. Beat it – Fall out boy
7. 一路好走 – 房祖明
8. 別望著我離開 – 周慧敏
9. 你還記得從前嗎? – 周慧敏
by karvitz | 2008-06-17 22:30 | :: 有歌而發