人気ブログランキング | 話題のタグを見る

:: 美日之旅 (3.6) - 去.舊金山.去

美國時間:
一四三零 (六月二十二日)

肚餓,要開餐了。(但我話你知而家係香港時間凌晨四點幾,你又有無胃口食呢?)

        
:: 碟頭豬扒飯,US $9,好多肉肉肉肉肉,飯的份量正常,豬扒燒得好似韓燒。 ::

食飽飯,都係應該進行下一個活動 - 血拼 Outlet

美國的大牌子A&F,Gap,H&M,Old Navy,CK等等大牌子,在呢個大Outlet 都有出現。可惜行勻全場,無咩斬獲。Gap 嫌老土,A&F 就剩低賣唔去的普通Tee,H&M 就唔係Outlet,無嘢睇。

最大驚喜都係搵到 Carrie (Sarah Jessica Parker) 幫手設計女裝的Steve & Barry's,雖然都係無咩特別,但都手痕痕地買咗兩件Tee,唔算抵,但好過買香港通街都係的Uniqlo。

        
       :: 無諗過去朝聖,行過見到就入去行下睇下都幾開心。 ::

地太大,高樓大廈自然少。今晚落腳的酒店在三藩市與聖荷西之間,如果盲摸摸無指示下搵酒店,我諗搵一日都未必成功。頻撲咗足足一日,加上附近無嘢買無嘢食無嘢玩,都係時候好好地小休一下。

        
        :: 呢次下塌Hilton 旗下的 Homewood 酒店。 ::

        
  :: 呢邊酒店唔多,套房 (Suites) 佔多數,有埋開放式廚房可以玩煮飯仔。 ::

一覺醒來望到個天泛著紅光,條件反射地覺得係黃昏時份,時間大約可能係六點幾。點知睇一睇表,原來已經係夜晚八點。再推返前少少,行入酒店放低行李時被太陽直接那一刻,原來已經五點幾,呢次真係體驗到八點幾先天黑的滋味。

        
            :: 呢個情景,係夜晚八點幾喎!::

星期日夜晚,聽說好多地方都會早關門,八點幾想搵食都幾難。旅伴提議食Burger,我當然舉腳贊成。

揸十幾廿分鐘車先去到,間快餐鋪頭叫《In N Out Burger》。 鋪頭裡面用白光管,裝修簡單,是香港十幾年前麥記的模式。而客人就咩人都有,日本人、黑人、白人、胡比高拔款有,連Jennifer Hudson款都有,都真係幾龍蛇混雜。

行入呢間嘢,我曾經對旅伴有少少懷疑 - 「真係好食?」。點知,佢捧返個紅 A 兜返來,我再望一望,「嘩!」原來呢度的薯條係用真正薯仔即批即炸,唔係雪藏料,真正薯條,非常好食。

        
         :: 你睇下個門面,加埋個霓虹燈牌幾老土。::

        
    :: 一人一個飽加薯條,用有個紅兜盛住。薯條好白,但超級好食。::

網站上有列明呢間分店的資料及相片,好懷念唷!
:: http://www.in-n-out.com/location_details.asp?id=142

食飽時間都唔早,走咗去行大型超市 Lucky。個超市無咩人氣,行勻成個場數埋都無廿個人客,但間店就大過Sogo B2 的面積。你可以幻想下Sogo B2 無人行,那種空洞感其實都幾恐怖。

P.S. 雪糕好平,而且好大盒,忍手得好辛苦,因為買咗之後一晚半晚一定食唔晒。

               ※ 第三日終於都完 ※
by karvitz | 2008-07-11 23:35 | :: 到處留情