人気ブログランキング | 話題のタグを見る

:: 美日之旅 (5) - Las Vegas

美國時間:
零六零零 (六月二十四日)

呢一朝好早要起身,為的係要還租車及搭飛機。

        
:: 傳說中的晚餐 Burger 竟然在早餐斬件上,Wonderful,但嚇咗我一跳囉! ::

食飽就起程,沿路返去三藩市機場,都幾塞車,幸好無遇到交通意外 (後日睇電視見到呢個路段真係有意外)。

      
             :: 返去三藩市機場的途程。 ::

去邊?
去Las Vegas 囉!

今次過安全檢查就真正遇到麻煩,一大班人聚埋一齊,情況就如繁忙時間的羅湖一樣。但在羅湖過關埋到櫃位都係頂多講兩句,Chop 個印之後就走得,但呢度…… 哈哈哈

呢度安全檢查要除袋,除錶,仲要除鞋,排在前面著鬆身褲哥仔仲要除埋皮帶(因為過金屬探測時響機),攪到哥仔「猛」得條褲,又拎唔到行李,麻麻煩。而我呢?我條皮帶在香港過到金屬探測,以為無問題就無除啦,點知過呢邊呢部機就響,攪到同一命運地要當眾除皮帶,好過尷尬。但最好笑都係一班被下令除皮帶的男仕在同一個地區一齊穿返條皮帶,呢個場景好好笑。

之但係,笑完之後就開始愁。



解說上面幅圖
1. Standby List : 即係暫時無機位,要等等等,如果有位剩就可以上機。
2. 排第一呢個係我。
3. 但呢班機剩返一個位。(但我個朋友排緊第二囉!)
4. 其實已經截止登機,如果拋低隊友,我就可以先風流快活,可惜我唔會咁做。

呢次Standby 的經驗幾難忘,呆在登機閘口等,望住個LCD 一直都覺得有機會安全上機 (因為之前都有剩十幾個位)。之後坐位慢慢無晒,到關閘時只係剩返一個位,個心都幾忐忑,因為得一個位我就肯定唔會自己一個上機。

在最終一刻,櫃位姐姐話有大約六、七個位剩,可以俾Standby 的人上機,那一刻真係好開心,期待的終於實現。

點解無啦啦突然又會有位剩?

旅伴話可能有乘客在轉機前做埋呢一班的Check in,所以電腦顯示無Remain Seat 係正確的。但最後可能因為之前班機Delay 或過唔到安檢而無辦法俾佢上機,咁那些之前Check in 咗的座位就可以放返出來,俾我地呢班Standby 緊的旅客。

當然唔會有連位座,自己顧自己。上到機綁好安全帶就真係差唔多起飛,好快趣。

我隔離位係位來自曼城的英國小姐,再隔離係土產美國男人,佢地兩個唔識,搭訕時我唔小心聽到。本來兩個都幾好傾,但唔知點解傾傾下Disconnect 咗,直到落機都無再傾…… 唔通土產美國男人想飛擒大咬?

        
  :: 睇完《一夜賭城玩大咗》個幾月後,真係去咗賭城,好神奇,多謝晒!::

無諗過會去拉斯維加斯,亦都無諗過拉斯維加斯個機場係咁舊,但我一早就知道呢邊日頭最高溫度係 42 度。

出境又係好方便,好自由唔使查。

出到大堂,已經見到好多賭場的廣告牌向你招手。裸男裸女 (唔會露點) 的廣告到處可見,真係好開放。酒店專車送我地返酒店,一落車,「嘩!」四野無人,如果唔係有間酒店及幾幢 Building,真係可以感受到沙漠的氣息。

        
       :: 真係由酒店房向外望,真係好荒蕪,感覺好新奇。::

        
           :: 酒店外貌,我譯為雙樹會酒店。::

        
   :: 每位入住酒店的顧客,都有一塊Welcome Cookies,估唔到又幾好食。::

        
  :: 好格式的酒店房,可能因為溫度關係,呢度係用分體式冷氣,好爽。::

        
  :: 酒店泳池,長時間都無人游水。出出面曬到咁,真係曬一曬都暈低。::

出面天氣成三十幾四十度,唔係一個出街的最好時間,大家同意小睡片刻,因為瞓醒之後會係一場和拉斯維加斯的惡戰 (唔係賭錢)。

               ※ 第五日半完 ※
by karvitz | 2008-07-15 23:55 | :: 到處留情