:: 假如我有三千「 」

　　假如我有三千蚊，我會先買盒 colleen 雙頭 36 枝72色顏色筆。再用百幾蚊買幾盒仙魔大戰朱古力夾心餅來儲起附送的貼紙。，跟手豪洗買部 Game Gear ，彩色的手提遊戲機，想玩好耐喇！

　　粗略計都仲有成千蚊，我仲可以買幾盒魔動王模型，買齊黑、紅、藍三色的「揮洒」鉛芯筆，用錢買個金牌「搖搖」，再每日請爺爺飲茶，買份東方俾佢睇，再買份《兒童日報》俾自己。

　　剩底的就儲起慢慢用，閒時在車仔檔買隻又大又貴的燒魷魚食，再買幾隻雞蛋型的大菜糕，請埋其他人食，做下大豪客，唔錯唔錯。

---------------------------------------------------------------------------

細個發夢有三千蚊已經心足，到咗而家呢個時候，三千蚊絕對係小數目。可惜，當望到有三千蚊的時候，你就「恨」有三千萬。當然，超過三千萬就更好。

以上係我十歲時候的幻想，到今日我真係花得起三千蚊，但上述大部份的都已經買唔返。

用最熱鬧鬧的話題來吸引你睇呢篇八十年代出生的自家兒時回憶錄，讓大家懷緬下已經收埋落床底的記憶，你的三千蚊其實又會係點？