人気ブログランキング | 話題のタグを見る

:: 馬尼拉.蘇碧灣.四

{蘇碧灣 - 馬尼拉.菲律賓}

平日的蘇碧灣異常寧靜,舒服得時間過得有點慢。閒遊蘇碧灣會見到以前的昌盛,有破棄的娛樂場,亦有精緻但已丟空的樓房,但所有店舖在平日的早上都顯得特別寧靜,就連餐廳都靜到好似無開門一樣,好舒服但唔適合我呢類城市人。咁亦都係呢個原因,一早就揀定呢日回程。



23032009 – 0900
一早起身就通處遊,希望行得幾多得幾多,望清楚呢個寧靜舒服的自由港。






:: 呢個燈塔的高層係一間酒店房,貴價嘢,浪漫首選。






:: 加咗個傻瓜Filter去影,感唔感覺到陣熱氣呢?




:: 大白天的嘉年華,又有另一番感覺。


:: 好簡單的酒店房,平價抵住。

23032009 – 1130
揹住背囊繼續行程,返回Olongapo 的麥當奴,點了杯黑牛 - Upfloat (可樂加朱古力新地),好飲到飛起,簡直係超值之選P25 ($4)。


:: 呢個係未加價前的餐牌,點計都平過香港。

23032009 – 1220
諗住每半個鐘頭有班車返馬尼拉,點知平日時間班次好疏落,而且仲要等廣播通知,最後等到一點鐘先有車,而且架車爆滿、車身又舊加埋冷氣又唔夠,一路坐一路出汗,前後左右的菲律賓人都設法開窗去散散熱,雖然呢程坐得幾辛苦,但我卻覺得咁先有揹背囊捱「旅程」的感覺,我就好享受喇,但老友就非常難受,佢坐到差點就想跳車,哈!




:: 上車前,Encore 呢檔漢堡飽。陳生舉機影相的時候,班姐姐開心到飛起喎!

--> 車程實況現場。 (唔知點解,我呢程車坐得幾開心喎!可能真係好耐未試過咁樣迫熱狗喇!)

23032009 – 1600
嚴重塞車,比原定時間遲了一段時間才返到 Pasay。在酒店落腳後照舊沖返個靚涼先,之後抖一陣就再戰馬尼拉。

23032009 – 1730
來到馬尼拉最繁盛的商業地區 – Ayala。各國的大牌子都在這區紮根,高消費高檔次,就好似走咗入另一個世界。我地入區的時候正值放工時段,人來人往,大部份人都著得好穿得靚,好明顯係一個搵到錢的地方。


:: 在地鐵站排隊買票,返大陸過關咁。


:: Ayala 的其中一個商場 - 領匯喎!






:: 如果有更多時間留低,相應該會影得更好。

小解:Ayala – Makata 商圈由幾個大型商場連接一齊,SM Mall、Giortta、Landmark 及最高檔的Greenbelt。前兩個商場屬於中檔次,Landmark 是最低檔的一間,可以買到大陸的老翻運動服。而Landmark 就所以國際知名牌子全聚集,高檔到悶場。

23032009 – 1900
聽網友講,Shakey’s 的薯塊是必試的,再加上我係薯仔狂,所以點都要一試。最後當一大兜薯類物體上枱後,oh my god……,吾友與我都覺驚訝,原來我們點錯咗,叫咗兜普通粗薯條,女服務員放低咗籃薯條後對我們竊笑,有排食呀呀呀呀!


:: Meat Ball Sandwiches + Fries 。


:: 就係呢一兜薯條,唔好睇少,個兜好鬼深....

小解:菲律賓的餐廳 (快餐) 都奉行一套碟頭飯的守則,即等如一個 Set Dinner 會有炸雞一件、沙律一堆、兩塊薯餅、一塊Brownie及兩件 Pizza,她們都喜歡放埋一碟,唔會分開上。行過幾間大型快餐 / 餐廳都係用呢種做法,大抵呢個就係佢地的文化。

23032009 – 2030
食飽飯就各自行街,平日商場收八點半,對於香港人來說簡直係早到癲。一早約好老友八點半在 Speedo Counter 等,我由八點四開始等,等到八點七,商場已經開始熄燈,店員都陸續趕人走,但我仍然未等到吾友。

點算呢? 愈心急我就愈四圍走,不停搵不停搵,點知去到某個賣衫櫃位,Sales 姐姐問「Are you looking for someone?」,我點晒頭,之後佢就指一指個更衣室,笑咗一笑,之後我真係衷心多謝佢。

其實我唔怕走失,我怕係我被人趕走咗,唔知係邊度可以等返吾友,亦擔心佢走失咗唔識返酒店。最後俾錢找埋數,八點五十分先離開,意猶未盡的大家,決定明天再闖呢區。

:: 待.續。
by karvitz | 2009-04-15 00:49 | :: 到處留情