人気ブログランキング | 話題のタグを見る

:: 零四二二

  




今日 – 四月廿二號,除了是朋友的生日外,更是一個值得紀念的日子。

眨下眼原來又一年。不經不過已在公司待了第五個年頭。

記得當年的一份臨時工,用上逐個月續約的形式,人工唔高,而且仲要到月尾 (三十號 / 三十一號) 先通知你會否繼續有得撈,做到第二個月都已經想放棄,如果唔係為咗幫朋友,呢個Offer及呢種合約形式的工,我一定唔會做。

到咗三月尾,公司無同我傾合約的問題,我以為大家和平分手,既然我又唔想繼續,朋友又再無搵我再幫手,雙贏。

點知過咗復活節的幾日公眾假期後,朋友又打電話來叫我簽約返工,今次調 / 掉 / 丟去另一個 Site。我望一望個合約,幾十個粗口字由心出發,原來公司為咗減本,索性不在月頭簽約,慳返幾日紅假的人工,再按比例計返餘下十幾日的人工俾我,真係慳得一蚊得一蚊喎!

其實朋友係做HR,因為當日見佢公司等人用,我自動提出話幫手,underpay 我都無所謂,最緊要幫到手及做得開心。但一望到呢份合約,真係火都滾,對員工刻薄到咁樣,同事又點會為你賣力呀?

今次連朋友都無情講,決定唔幫唔簽唔做,拋返個身出去自由的勞動市場,順利地就搵到而家呢份工。

可算是重光,又可算是爭返口氣,初入職的時候每年都仲有二十一日大假,加埋長工制,而唔係每年 / 每月的合約制,相比之前那間所謂大機構,明顯而家呢間大機構對員工真係視為最重要的資產。

就由當年的四月二十二日開始,我開始謹守我自己的崗位,一直到而家,一直都未變過。


謹記五週年紀念。
by karvitz | 2009-04-22 22:59 | :: 日記仔女